عجائن ومخبوزات

طريقة عمل العيش الفينو مثل المخابز،سر العيش الفينو،طريقه عمل الفينو،طريقة العيش الفينو الهش

حبايبى الحلوين اخباركم ايه
جيبالكم بقى الوصفه اللى من الاخر
انسوا انكم تشتروا عيش من باره تانى بإذن الله
ما شاء الله اللهم بارك شايفين الجمال


شايفين العيش و جماله و لونه و هشاشته


بغض النظر عن سندوتش الطعميه الجامبو داه اللى طبعا بيتى و الطعميه فى العيش الفينو دى مزاج بقى

بجد من احلى و أنجح وصفات العيش الفينو اللى هتجربوها
دى وصفتى المعتمده من فتره طويله
هش و ناعم و طرى و قطنى بشكل رهييييييب و لا ريحته اللى هتجيب آخر الشارع
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه
العيش الفينو البيتى الاصلى على طريقتى

المقادير :
هنقسمها لمرحلتين
المرحله الأولى :
كوب لبن اللى هو الحليب دافئ
نصف كوب دقيق بيتزا و مخبوزات او جميع الاغراض
م ك ممسوحه خميرة فورية
٢ م ك سكر
المرحله الثانيه :
كوب ماء دافئ
ربع كوب زيت
٢ بياض بيض و الصفار هندهن بيه الوش بياض البيض مهم اوى لأنه بيدى طراوه و هشاشة و نعومه رهيبه للعجينه
م ك زبده طريه بدرجة حرارة الغرفة بتدى غنى و طراوه و طعم مميز للعيش
م ص ملح
٥ أكواب دقيق بيتزا و مخبوزات او جميع الاغراض اكتر أو اقل حسب العجينة ما تلم معانا
خليط دهان الوجه :
صفار البيض مع شويه لبن و رشة قهوه سريعة الذوبان أو كام نقطه خل
للوجه :
سمسم و حبة البركة

طريقه عمل العيش الفينو البيتي مافيش اجمل من كده
الطريقة :
هنجيب بوله و نحط فيها مكونات المرحله الأولى اللى هما اللبن الدافئ و الخميره و السكر و الدقيق

و نقلبهم كويس و نغطيهم و نسيبهم ربع ساعه يتفاعلوا مع بعض و بعدين هنضيفلهم الزيت و بياض البيض
و نقلب كويس و بعدين هنضيف الدقيق اللى عليه الملح بالتدريج بالتبادل مع المياه الدافيه و فى اخر مرحله من العجن
هنضيف معلقة الزبده الطريه و لازم نعجنها كويس اوى مش اقل من ٧ دقايق لغايت ما تلم معانا و تبقى ناعمه و ملساء
و بنغطيها و بنسيبها تخمر لغايت ما يتضاعف حجمها و بعدين بناخدها و بنقسمها لكور حسب حجم الرغيف
اللى احنا عايزينه و بنغطي الكور و نسيبهم يرتاحوا حوالى ربع ساعه و بعدين بناخد كل كوره و نفردها بشكل بيضاوى
و نبدأ نلفها على شكل رول أو اسطوانه و نقفلها كويس اوى و نقفل الأطراف و نخلى القفله من تحت علشان
ما يفتحش معانا لما يخمر و بنخلص الكميه كلها و بنرصهم على صينية الخبز على ورق زبده أو ندهن الصينيه دهنت زيت خفيفة
و بنغطيهم و بنسيبهم يخمروا مره كمان قبل الخبز لغايت ما يتضاعف حجمهم و بعدين بندهنهم بخليط الدهن
بالراحه علشان ما نوقعش التخمير و نرش عالوش سمسم و حبه البركه و بندخلهم فرن سخن على الرف اللى
فى النص على درجه حرارة 190/200 لغايت ما يستوا و ياخدوا لون حلو و اول ما نطلعهم من الفرن
بنغطيهم بفوطه نظيفة علشان نحافظ على الرطوبة جواهم و يفضلوا طريين و ماننساش نحط صينيه فيها مياه بتغلى فى قاع الفرن
علشان تطلع بخار و داه بيطري المخبوزات
و بالهنا و الشفا

طريقة العيش الفينو البيتى – وصفه خطيره لعمل العيش الفينو مجربه




















yasmen

كما شهرزاد.. حكت لتُبقي نفسها على قيد الحياة، أكتبُ لأبقِى نفسي على قيد الحياة. إنّني مع كلّ نصٍّ أكتبه أكتشف حقيقة أخرى مخبأة في داخلي.
زر الذهاب إلى الأعلى