حبايبى الحلوين اخباركم ايه
يا رب تكونوا بخير ربنا يسترها علينا و يحفظنا جمعيا و يعدى الأيام دى على خير يا رب
دعواتكم ليا و لكل مريض بالشفاء اللهم امين يا رب العالمين
يالا نعمل وصفه حلوه اوى للفطار أو العشاء
ما شاء الله اللهم بارك شايفين الجمال
شايفين اللون و الهشاشه
عجينه هشه جدا و ناعمه و قطنيه و محشيه منها فيها يعنى وجبه كامله متكامله
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
فطيره الجبنه الهشه جدا و القطنية
مقادير فطيره الجبنه :
المقدار داه بيعمل فطيره كبيره بالحجم مقاس ٢٨ أو ٣٠ سم داه أو اتنين صغيرين
٣ كوب دقيق بيتزا و مخبوزات او جميع الاغراض
م ك خميرة فورية
م ك سكر
م ك مليانه زبادى بتفرق فى النتيجه لأنها بتدى نعومه و هشاشه للعجينه
٣ م ك زيت
بياض بيضه و الصفار هندهن بيه الوش
ملح
كوب لبن اللى هو الحليب دافئ اكتر او اقل حسب العجينة ما تلم معانا
خليط دهان الوجه :
صفار بيضه و شويه لبن و رشة قهوه سريعة الذوبان أو كام نقطه خل
- للوجه :
اى نوع جبن تحبوه انا هنا استخدمت جبنه بيضاء و موتزاريلا
سمسم و حبة البركة
طريقة عمل العجينة :
هنجيب بوله و هنحط فيها شويه من اللبن الدافئ و الخميره و السكر
و نقلبهم كويس
و نغطيهم و نسيبهم ربع ساعه يتفاعلوا مع بعض و بعدين هنضيفلهم الزيت و الزبادى
و بياض البيضه و نقلب و بعدين هنضيف الدقيق
اللى حاطين عليه الملح بالتدريج بالتبادل مع اللبن الدافئ
لغايت العجينه ما تلم معانا و تبقى ناعمه و ملساء و لازم نعجنها كويس
مش اقل من ٧ دقايق
و بنغطيها و بنسيبها تخمر لغايت ما يتضاعف حجمها و فى الوقت داه هنجهز الصينيه
اللى
هنخبز فيها هنبطنها بورق زبده أو ندهنها بالزيت و نعفرها بالدقيق و بعدين هناخد العجينه
و نفردها بشكل دائرى بسمك متوسط
و نحطها فى الصينيه و بالسكينه هنعمل فيها خطوط بالطول
و العرض بس طبعا ما نوصلش لتحت بحيث يبقى عندنا ٨ مثلثات
و بأطراف صوابعنا كده
هنضغط و نعمل شكل حوالين داير على الأطراف و على الخطوط
اللى عملناها هنحط الجبنه
و هنرش السمسم و حبه البركه و هندهنها بخليط الدهن و هنغطيها و نسيبها ترتاح حوالى ربع ساعه
قبل الخبز و بعدين هندخلها فرن سخن على الرف اللى فى النص على درجه حرارة 190/200
لغايت ما تستوى
و تاخد لون حلو و ماننساش نحط صينيه فيها مياه بتغلى فى قاع الفرن علشان تطلع بخار
و داه بيطري المخبوزات و اول ما نطلعها من الفرن
بنغطيها بفوطه نظيفة علشان نحافظ على الرطوبة جواها
و تفضل طرية
و بالهنا و الشفا
