طريقة عمل طاجن المكرونة باللحمة المفرومة زي محلات الكشري
طواجن محلات الكشرى
طاجن مكرونه سجق وطاجن لحمه مفرومه
الطريقه تحت كل صوره زى كل مره
ادعولى دعوة حلوة بس
شغل فاخر من الآخر
مين كشرى الرحماني ناو
يلا ع المكونات
بتاعتنا لحمه مفرومه متعصجه وسجق متشوح من غير اى دهون خالص
ومتقطع صغير كيس مكرونه قلم كيلو طماطم ومعلقتين صلصه طماطم
معلقه صغيره ملح ونص فلفل اسود ونص بابريكا ومعلقتين كبار خل
أول حاجه هنعصر الطماطم مع كوبايه ميا كبيرة ومعلقتين الصلصة
في حله ع النار هنسخن تلات اربع معالق زيت
وننزل بالبهارات الملح والفلفل والبابريكا وممكن تزودو البهارات اللى حابينها
أول ما نشم ريحتها ننزل عليها بالخل
وبعدين عصير الطماطم ولو مش عاوزين الطماطم
تبقى حاميه ضيفو معلقه سكر صغيره
هنغطى عليها ونسيبها تاخد غلوتين
يعنى مش تتسبك يادوب سبع دقايق بس
هنحضر الطواجن وممكن لو مش موجوده نستخدم بايركس أو طواجن فخار
لو خايفين تلزق امسحوها بفرشه زيت انا اكتفيت بدهون اللحمه والسجق
عملت اتنين لحمه واتنين سجق
وبعدين هنحط المكرونه لحد ما نوصل لتلات اربع الطاجن
مش اكتر ونسيب الربع الأخير فاضى مكرونه من الكيس عادى مش مسلوقه
لكل طاجن من دول هياخد كبشتين ونص صلصه
لو اخدتو بالكو هتلاقوها خفيفة وممكن تزودو لحد تلات كبشات
المكرونه متغطيه بالصلصه هكون بسخن الفرن على درجة حرارة عالية 220
حطيت ورق زبده ع اد الطاجن وغطيت بالغطا عشان المكرونه تتكمر كويس
هندخلها فرن سخن الرف اللى فوق الأرضية لمده نص ساعه لحد 40 دقيقة
لما تطلع نسيبها تهدى خمس دقايق وبعدين بسكينه
أو اسباتيولا نسلك الحروف قبل ما نقلبها وبس خلاص
وطبعا من بكره هنعمل دايت جامد اووى
