حبايبى الحلوين اخباركم ايه
جيبالكم بقى حبيبة الملايين اللى مغلبانا و مجننانه
طريقة عمل البسبوسة الاصلية فى المنزل مثل المحلات واسرار نجحها .
ما شاء الله اللهم بارك شايفين الجمال
انا مش هتكلم بقى شايفين اللون و الترميله لا و كمان ماسكه نفسها ازاى
بعد تجارب كتير و عذاب أفضل وصفه وصلتلها
مش صعبه بس لازم تاخدوا بالكم من كل التفاصيل الصغيره لأنها حقيقى بتفرق فى النتيجه
و ناجحه جدا من اول مره بإذن الله بشهاده كل اللى جربها
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
البسبوسه المرمله الاصليه على طريقتى
لو عايزينها رفيعه زى دى هتعملوها في صينيه مقاس ٢٦ و لو عايزينها اتخن يبقى هتصغروا الصينيه شويه فبراحتكم
مقادير البسبوسه
٢ كوب سميد اللى هو دقيق البسبوسة أو السيمولينا
كل دى مسميات ليه ساده بدون اى إضافات مش الخلطات الجاهزه اللى بتتباع ياما تجيبوه سايب من عند العطا
أو مغلف من السوبر ماركت
رشه ملح
١/٢ كوب سكر و ممكن تقللوه شويه لأن لسه هنسقيها شربات فمتبقاش مسكره اوى
م ص بيكنج بودر
١/٣ ثلث كوب زبادى و الثلث كوب يعنى اكتر من الربع بمعلقه كبيره و يفضل زبادى بلدى أو حسب المتوفر
٢ م ك مليانه سمنه و يفضل بلدى أو حسب المتوفر
٢ م ك عسل نحل أو عسل جلكوز أو شربات تقيل
الشربات :
١ و ١/٢ كوب سكر
١ و ١/٢ كوب مياه
عصير ليمون
م ك سمنه
م ك عسل نحل أو عسل جلكوز
الطريقه :
لافضل نتيجه بإذن الله لازم الالتزام بكل التفاصيل
اول حاجه هنجيب الصينيه اللى هنسوى فيها و ندهنها بالسمنه كويس و نسيبها على جنب
و هنجيب بوله و نحط فيها كل المواد الجافه مع بعض السميد و السكر و رشه الملح و البيكنج بودر
و نقلبهم كويس و نسيبهم على جنب و فى كسروله عالنار هنحط الزبادى و السمنه و العسل
و عايزينهم يدوب يدفوا مش يسخنوا أو يغلوا يدفوا و يندمجوا مع بعض و هنرفعهم من عالنار
و هنعمل حفره فى المواد الجافه و ننزل بيهم و هنا بقى من أهم النقط فى نجاح البسبوسه
هنقلب بأطراف صوابعنا و يدوب كام تقليبه و خلاص بحيث كل المكونات تمتزج مع بعض
و الخليط بيكون تقيل داه عادى مش كل ما يبقى طرى تبقى أنعم لا خالص
اوعوا تقلبوا كتير لان دى من أهم أسباب عدم نجاح البسبوسه و انها تنشف معانا هناخدها
و نفردها فى الصينيه و نبل ايدينا بشويه مياه علشان نقدر نساوي الوش أو أى تشقيقه فيها و ياما
بنسيبها ساده أو نحط مكسرات عالوش و نضغط عليها شويه علشان تثبت براحتكم
و بعدين نيجى لنقطه تانيه مهمه هنسيبها مكشوفة فى الهوا من نصف ساعة لساعه لأنها لازم ترتاح
قبل ما نسويها ليه لان السميد نوع من انواع الدقيق و فيه نسبة من الجلوتين حتى لو قليله
فلازم بعد ما قلبناه و اشتغلنا فيه نسيبها ترتاح علشان تدينا نتيجه حلوه و تبقى طريه
و بعدين هنسويها بندخلها فرن سخن على الرف اللى فى النص على درجه حرارة ١٨٠
اول ما الأطراف تلون بنشغل الشوايه بحيث تاخد لون حلو
طريقه عمل البسبوسه فى البيت
أسرار البسبوسة الناجحة زي المحلات
سر تماسك البسبوسة
البسبوسه الاصليه
سر هشاشة البسبوسه