حبايبى الحلوين اخباركم ايه يا رب تكونوا بخير
وحشتونى قد الدنيا كلها غيبت عنكم شويه غصب عني و الله الحمدلله على كل حال
رجعالكم بقى بمفاجأة ماحصلتش
ما شاء الله اللهم بارك شايفين الجمال
لا احنا هنافس المحلات بقى
تورته الفادج كما قال الكتاب
و هنعملها من غير مضرب و لا خلاط كمان ها ايه رأيكم بقى
الكيك ناعم و طرى بشكل رهييييييب و طعمها غنى جدا و لا الجناش بجد وهمى هتعتمدوه فى كل حاجه
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
تورته فادج الشيكولاته الرهيييييبه
المقادير :
المقدار داه بيعمل صينيه مدوره مقاس ٢٤ سم و ممكن ٢٦ سم حسب الارتفاع اللى انتوا عايزينه
٤ بيضات بدرجة حرارة الغرفة
كوب و نصف سكر بودره منخول
فانيليا
رشه ملح
م ك خل
م ك بيكنج بودر
م ص بيكنج صودا اللى هى بيكربونات الصوديوم اللى هى الكربوناتو موجود عند العطار
اللى بيتحط في الطعميه و مهم جدا لان الكيكه فيها نسبه كاكاو كبيره و داه بيخلى الكيكه
تقيله و لازم حاجه تانيه ترفعها مع البيكنج بودر
نصف كوب زيت
كوب لبن رايب أو لبن حليب عادى
كوب ماء مغلى
ثلاث اربع كوب كاكاو خام منخول و يفضل يكون نوع كويس علشان بيفرق فى الطعم
٢ كوب دقيق منخول
للحشو :
كريم شانتية مخفوقه بالشيكولاته
جناش الشيكولاته
٢٥٠ جرام شيكولاته مبشوره
١٢٥ مللى كريمه سائله أو لبن اللى هو الحليب و طبعا يفضل الكريمه
م ك زبده
الطريقه :
هنجيب بوله و نحط فيها الدقيق و الملح و البيكنج بودر و البيكنج صودا و الكاكاو و نقلبهم كويس
و فى بوله تانيه هنضرب البيض مع الفانيليا و الخل و السكر البودره لغايت ما نتأكد ان السكر داب تماما
و كله امتزج مع بعضه و مش محتاجين و لا مضرب و لا خلاط بالمضرب السلك اليدوى عادى خالص
و بعدين هنضيفلهم الزيت و اللبن الرايب و نضربهم كويس مع بعض و بعدين هنضيفلهم المواد الجافة
و فى اخر مرحله هنضيف المياه المغليه و نقلب كويس اوى بحيث يبقى عندنا خليط ناعم بدون
اى تكتلات و هنحطها فى الصينيه اللى هنسوى فيها و نكون دهننها دهنت زيت خفيفة
و معفرينها بالكاكاو و بندخلها فرن سخن على الرف اللى فى النص على درجه حرارة 180
لغايت ما تستوى معانا و بنقدر نختبرها بخله أسنان او سكينه بعد حوالى نصف ساعه و بعدين ما تستوى
بنخرجها و بنسيبها تبرد تماما و ممكن تشتغل فيها فى نفس اليوم او تانى يوم براحتكم بنقسمها حسب عدد الطبقات
اللى تحبوه و بنبدأ نعمل الجناش بنسخن الكريمه أو اللبن كويس اوى و بعدين بنرفعها من عالنار
و بنضيفلها الشيكولاته المبشوره و الزبده و نقلب كويس اوى لغايت ما نتأكد انها دابت تماما
و بقى قوامه ناعم هناخد منه كام معلقه فى بوله كده و ندخلهم الثلاجه يشدوا شويه علشان نعمل بيهم الروزتات
للتزيين فى الاخر و هنبدأ نظبط التورته بتاعتنا هناخد طبقه من الكيك و نسقيها بحاجه بسيطه
من الجناش السايل اللى عندنا
كيكة فادج الشيكولاتة
طريقة عمل الفادج كيك
