حبايبى الحلوين اخباركم ايه يا رب تكونوا بخير
كل سنه و انتوا طيبين يا حبايبى بمناسبة ذكرى عاشوراء
ما شاء الله اللهم بارك شايفين الجمال
شايفين كريمى و تجنن ازاى
العاشورا الكريمى باسهل واحلى طريقة
بجد طعمها رهييييييب كريمى جدا و قوامها تحفه
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
العاشوراه الكريمى الغنيه على طريقتى
المقادير :
انا هنا عملت مقدار صغير و تقدروا تضاعفوه
١٢٥ جرام قمح أو غله اللى هى البليله يعنى حوالى ١/٨ كيلو
مياه مغليه لسلق البليله
نصف لتر لبن اللى هو الحليب
سكر حسب الرغبه
فانيليا
نصف كوب كريمه سائله اللى هى كريمه الخفق للحلويات
من ك نشا
٢ م ك قشطه علب أو قشطه وش اللبن
٢ م ك كريم شانتيه بودره حسب الرغبه
الطريقة :
بنغسل القمح كويس اوى و بننقعه ليله كامله و تانى يوم بنسلقه و لازم المياه تغطيه
و نقلبه بإستمرار علشان ما يتلسعش لغايت ما يستوى و ينفش و يشرب المياه
و بعدين بنجيب حله و بنحط فيها اللبن و الكريمه السائله و السكر و الفانيليا و القشطه
و نقلبهم كويس اوى و نضيف القمح المسلوق و نقلبه و نخليه يغلى كام غلوه و نكون مدوبين النشا
و الكريم شانتيه البودره فى شويه لبن عالبارد طبعا و نضيفهم عالبليله بتاعتنا و نقلب و يدوب يغلى كام غلوه
بحيث نتأكد ان النشا استويت تمام و بنغرفها فى اطباق التقديم و نسيبها تبرد و تتماسك
فى الثلاجه و نزينها حسب الرغبه
و بالهنا و الشفا
