اسرع اكله بصدور دجاج مع طبق بطاطس متبلة
المقادير بالنسبة للدجاج
صدور دجاج مخلية من العضم وسليمة
نص معلقة صغيرة ملح
نص معلقة صغيرة فلفل اسود
نص معلقة صغيرة زعتر
نص معلقة صغيرة بابريكا
فصوص ثوم مقطع شرايح رفيعة
٤ معالق اكل زيت
٤ معالق اكل خل
نص كوب ماء
المقادير بالنسبة للبطاطس
٤ حبات بطاطس مقطعة مكعبات
ملح
٣ معالق كبيرة زيت نباتى
نصف معلقة كبيرة ثوم مهروس
معلقة صغيرة بابريكا
نص معلقة صغيرة كزبرة مطحونة
نص معلقة صغيرة فلفل اسود
نص معلقة صغيرة اعشاب مجففة
رشة ملح
كزبرة خضرا
الطريقة
هتجيبى صدور دجاج تقطعيها بالسكين تعملى فيها فتحات
وتجيبى طبق صغير تحطى فيه نص معلقة صغيرة ملح ونص معلقة صغيرة فلفل اسود
ونص معلقة صغيرة زعتر ونص معلقة صغيرة بابريكا وتقلبى كويس
وتنزلى بالخلطة دى على وش وظهر صدور الدجاج
وتدعكيهم بيايدكى كويس وتجيبى الثوم تقطعية شرايح رفيعة خالص
وتحشى الفتحات اللى فى الدجاج بالثوم كل فتحة شريحتين
ثوم وتجيبى مقلاة تحطى فيها صدور الدجاج والنار شغالة وتنزلى
على صدور الدجاج ب ٤ معالق اكل زيت توزعيهم فوق الصدور
و بعدين تنزلى جنب شرايح الدجاج فى الفراغات يعنى ب ٤ معالق كبيرة خل
ونص كوب ماء وبعدين تغطى المقلاة وتنتظرى الماء يغلى ولما يغلى
تقللى النار لمتوسطة وتغطيها تسبيها تستوى ٢٠ دقيقة
بعد مرور ال ٢٠ دقيقة هتلاقى الماء اتبخر والدجاج اتحمر من تحت
فتقلبيه على ووشه وتحطى نص كوباية مايه و يتحمر كمان لمدة ٥ دقايق بس كده
وبالف هنا و شفا
،،، البطاطس بقى ….
٤ حبات بطاطس تقطعيهم مكعبات وترشى عليهم ملح
وتقليهم وبعدين تخرجيهم من الزيت وبعدين تجيبى مقلاة تحطى فيها ٣ معالق كبيرة زيت نباتى
ونصف معلقة كبيرة ثوم مهروس و معلقة صغيرة بابريكا
ونص معلقة صغير كزبرة مطحونة ونص معلقة صغيرة فلفل اسود
و اعشاب مجففة و رشة ملح و تقلبيهم على النار فقط دقيقة
وبعدين تنزلى عليهم بالبطاطس المقلية وتقلبى كويس
وبعدين ترشى كزبرة خضرا على الوش «كسلت احط كزبرة خضرا »
وتقلبى كويس لحد ما تتشوح كويس وبالف هنا و شفا
