ورقة اللحمة
مساء الخير جميعا
بعد لما عملت ورقة الكبدة كله سألني طيب فين ورقة اللحمة …
والصراحه انا من عشاق ورقة اللحمة
لأنها سهلة وبسيطه اينعم مش سريعه في الفرن
بس كفايه أنها مش متعبة ولا بتأخد وقت في اني اجهزها فيالا بينا علي الطريقه
مقادير ورقة اللحمه الذيذة :
-٤/٣ كيلو لحمة
– خضار مقطع شرائح ” بصل . فلفل . جزره . بصله خضراء وكراته أن وجد “
– بطاطس حسب الرغبه قطع كبيره وممكن الاستغناء عنها – ملح .
بهارات ” فلفل . بهارات لحمة . رزوماري وحبهان مطحونين أو حصي . كسبره ناشفة رشه جنزبيل وقرفه “
– ٢ معلقه صويا صوص أن وجد
طريقة عمل ورقة اللحمه
– اهم حاجه بالنسبه ليا في ورقه اللحمة وبتفرق في الطعم اننا نختار قطعيه حلوه
مش هتفرق
بقا هي منين المهم تكون ناعمه وطريه وفيها نسبه دهن وكمان العظم بيخليها احلي ..
انا نزلت صوره مقربه للحمه وسواء بقا القطعية
من بيت الكلاوي أو الموزه أو الفلتو
والانتركوت كل دي هتكون حلوه في ورقه اللحمه
– هنقطع كل الخضار بتاعنا شرائح والبطاطس لو حابين ممكن نضيف بطاطس براحتنا
بس انا بحب احط واحده بطاطس تتقل الصوص وكمان عشان متبقاش تقيله
يعني انا مش بحب ازود بطاطس فيها كخضار
– هنبهر الخضار واللحمه وفي طاجن هنبطنه بورقه فويل وعليه ورقه زبده وهنقفله كويس جدا جدا
يعني يكون محكم الغلق – هنسخن الفرن علي ٢٠٠ وهنسيبه علي حسب قطعيه اللحمه بتاعتنا
في انواع بتأخد ساعتين وفي ثلاثة لما نفتح عليه ونلاقي لحمتنا استوت
ممكن للي بيحب يطفي فيها فحمة ويقفلها تاني ويسيبها كمان ربعايه في الفرن وبس كده والله
“ملحوظة غاية في الاهميه ”
* كلمة بصراحه انا محبتش اقولها في المقادير ولا اصورها ورقه اللحمه
بتحب جوزه الطيب جدا
زي الفراخ ما بتحب المسطرده والسمك ما بيحب الكمون والكسبره بالظبط
بس انا خوفت اقول كده عشان الجدل الي عليها ومحبتش أخوض ولا أن حد يدخل يعلقلي
بكده فأنا قولتلكوا اهو وريحت ضميري للي معندوش مشاكل معاها
- * الي في الطاجن ده عود روز ماري فريش موجود في الهايبرات الكبيرة
