بم اننا داخلين علي رمضان
ف احب اقترح اننا نعمل وجبه فطار خفيفه علي المعده وطعمها لذيذ
(شاورما سوري +بطاطس سوري +توميه +عصير مانجه)
ولو كورونا منعت المطاعم مننا احنا نجيب المطعم جوا مطبخنا يا حلي بنات
المكونات موجوده في مطبخنا سهله وبسيطه
طريقة عمل العيش سوري
مكونات العيش السورى :
3 كوبايات دقيق، ملعقه كبيره خميره، نص ملعقه سكر، نص ملعقه صغيره ملح، 3 ملاعق زيت، مياه
خطوات عمل الخبز السورى :
كوبايه مياه دافيه ونضيف فيها الخميره والسكر ونقلبهم كويس،
نجيب حله للعجن نحط فيها الدقيق والملح والزيت ونقلبهم،
ضيفي خليط المياه والخميره والسكر علي خليط الدقيق واعجني كويس لحد ما تبقي عجينه متماسكه
معاكي ولو احتجتي ميه ضيفي شويه صغيرين
وبعد كده غطي الحله بفوطه سخنه او نايلون وسيبيها تخمر نص ساعه
طريقة عمل الشاورما السوري
3 صدور فراخ مخليه، 3 حبات طماطم متوسطه، حبتين بصله متوسطين،
4 حبات شطه خضرا، 3 فصوص توم، 2 ملعقه كبير دبس رمان، ملح وفلفل اسود وشطه حمرا علي حسب الرغبه
خطوات عمل الشاورما :
قطعي الفراخ شرايح طويله ورفيعه
قطعي البصله نصين بالطول وكل نص قطعيه حلقات رفيعه
قطعي الشطه والطماطم بنفس طريقه البصل اهم حاجه حلقات رفيعه
اهرسي التوم كويس
هاتي طاسه وحطي فيها 3ملاعق سمنه و3 ملاعق زيت وارمي فيها البصله
لحد ما تدبل حطي عليها الشطه لحد ما تدبل برضو
ارمي عليهم الفراخ وشوحيهم سوا
لحد ما الفراخ تاخد نص سوا
حطي دبس الرمان والطماطم والتوم والتوابل وقلبي كويس
وضيفي شويه ميه علشان فراخك تستوي
هتلاقي ان العجينه خمرت
قطعي العجينه كور صغيره
وافردي دقيق علي الرخامه
وبالنشابه بقي افردي الكور لحد ما تبقي زي القرص خفيفه كده
تكوني جايبه صنيه بسبوسه وكفياها بالمقلوب علي النار هاديه عندك
كل قرص تعمليه حطيه علي الصنيه وخلي بالك عيشك يحمر ما يتحرقش منك
وبين قرص وقرص امسحي الصنيه بفوطه نضيفه
بعد ما عيشك استوي هات واحد وادهنيه بصوص الشاورما و حطي شاورما بتاعتك
وحطي فوقيها شرايح خيار مخلل وشرايح شطه مخلل ولفي عيشك رول
وطاسه صغيره مدهونه زي حمري السندوتش بتاعك
وبالهنا والشفا واسفه لو طولت عليكم
