ناجتس الدجاج المقرمش احلى من الجاهز … Crispy Chicken Donuts
بعد اللانشون وبرجر الفراخ وبرجر المصانع
يلا نعمل
ناجتس الفراخ الكرسبى المقرمش زى الجاهز تمام
والولاد هيحبوه اووى
مش هتجيبو المجمد تانى
الطريقه تحت كل صوره زى كل مره
ادعولى دعوة حلوة بس
كرسبى وقمر من برا ولحمه أبيض وجميل من جوا
مع شويه الحركات بتاعه ماك الولاد هيحسو أنها وجبة من برا
المكونات
نص كيلو صدور بانيه متقطعه مكعبات عشان هتتفرم أربعه شريحة توست أبيض
نص معلقه صغيره ونص فلفل اسود ونص بابريكا ومعلقة كبيرة بهارات فراخ
ومعلقتين كبار صويا صوص ونص معلقه صغيره توم مفروم وقطعه جنزبيل فريش
أو نص معلقه جنزبيل بودر ولو بتحبو المرقه حطو مكعب واحد
الطريقة
نشيل الحروف البنى اللى بتبقى في حرف التوست بالسكينة
وممكن رغيفين فينو و متشال حروفهم بردو
نحطه في الكبه
ونفرم ع سرعه عاليه لحد ما يبقى زى الرمل كده
نشيل التوست و مكانه نحط الفراخ تتفرم وعليها كل التوابل والصويا صوص والجنزبيل والتوم
نفرم كله مع بعض جامد
نرجع عليه التوست
ونلفهم مع بعض ويتعجنو مع بعض كويس ولو لاقيتها تقيله شويه ممكن نزود معلقتين كبار ميا
نجيب اى صنيه مستطيلة ونحط فيها كيس بلاستيك
وعليه مفروم الفراخ
نحط عليه كيس بلاستيك تانى ونفرد بسمك متوسط
دى بتسهل عليا اوووى صغيره بس نينجا
وندخلها الفريزر نص ساعه
بيضتين وعليهم معلقتين كبار لبن وملح وفلفل اسود
ونحضر كريسبى أو بقسماط مطحون خشن أو كورن فليكس مطحون وعليهم ملح وفلفل اسود
وتوم بودر وبصل بودر وكيس مرقه فوريه وتقبلهم ع بعض
كرسبى جاهز بيتباع في السوبرماركت أو بقسماط مطحون خشن أو كورن فليكس مطحون خشن
دى بعد ما خرجت من الفريزر
نقطعها مربعات بالسكينة أو اشكال بالقطاعات
السمك ده تمام اووى
ننزلها فى البيض بعدين الكرسبى المقرمش ولو عاوزينها مقرمش اووى كررو الخطوه مرتين
ممكن تحطوها في الفريزر ونطلع ع اد الاستخدام اهم حاجه يكون بينهم فواصل
زى كده كيس بلاستيك او ورق زبده
هندخلها الفريزر ربع ساعة قبل القلى يعنى على ما الزيت يسخن
ع زيت سخن ننزل بيها مش بتاخد وقت في التحمير
ونقلب ع الوش التاني
نطلع على مصفاه مش مناديل مطبخ عشان تفضل مقرمشه
وبس خلاص
كرسبى وقمر من برا ولحمه أبيض وجميل من جوا
مع شويه الحركات بتاعه ماك الولاد هيحسو أنها وجبة من برا
