محشى الكرنب بكل تكاته – محشى الملفوف بسهوله بالخلطة الجبارة
*جربتى تبقي جعانه أوى ومش قادرة تقومى تحضرى لنفسك الاكل فتكسلى وتنامى جعان ؟جربت ترجعى من شغلك مكسره ومطلوب منك انكى تروقى وتغسلى وتنشرى وتعملهم غصبا عنك ؟
جربتى نشفان المعدة من اكل المطاعم البلاستيك وحرمانك من اكل امك وطعامته ؟
جربتى احساس القهرة لما تتعب وتلاقي نفسك مرمى فى غرفتك ومحدش حواليك ؟
جربتى تشتاق اوى لبلدك وناسها وتبقي هتموتى وترجعى ولما ترجعى تلاقي كل حاجة اتغيرت
والنفوس اتبدلت فتتخنق وتسيبها وترجع لغربتك ؟
جربتى تسألى نفسك السؤال دة مليون مرة فى اليوم وما تلقاش ليه اجابة ؟
طب جربتى فى كل صلاة بتصليها تدعى ربك اوى وانتى خايفه ومرعوبه انه يحفظلك اهلك
واحبابك وترجع تلاقيهم كويسين زى ما سيبتهم ؟
ما جربتش صح ؟؟؟ طيب مدام ما جربتش ليه كل اما نكتب حاجة عن غربتنا وقرفها
بتوجع دماغنا بتعليقاتك اللى مالهاش لازمة ليه
ليه لما حد بينزل حاجه يحاول يخرج من مرار الغربة تروح سيادتك مرجع في وشه بكلامك ؟؟
كلامى موجه للناس بتوع حزب || خلقنا لنعترض
خليك لطيف هتبقى أحسن والله
أيها السادة الأعزاء محبي المحشي فقط انتم فقط
اللي هتعطوا للمحشي حقه لأنه بصراحة اتهان الفترة الاخيرة دي
وأنا بصراحة زعلانه وبدأت أفكر أسيب الكيمياء وابدل ما ابقى بتاعت كيمياء أبقا بتاعت محشي
المهم البوست دا له هدفين :
الهدف الأول : المغتربين الكحيانين اللي زي حالاتي عايزهم يدلعوا نفسهم ويعطوا للمحشي حقه
الهدف الثاني: عيد الحب هتقولي اي علاقته بالمحشي هقولك لأن المحشي دا بشوف فيه مالم رآه روميو في جوليت
وبعدين يا جماعه المحشي دا بيغسلني من جوا والله
ركز يا كحيانه انتى وهى وبطل كسل ودلع نفسك متفضلش طول غربتك من غير محشي
وبالنسبة للراجاله اتفرجوا من بعيد علشان دي امكانيتنا
الطريقة
زي ما عودتكوا مع الصور
الكرمب تقطعه مربعات كده وحسسى نفسك شيف وانك بتعمل اللي فيه ستات كتير مبتعملوش
وفي البداية يا كحيانه انتى وهى علشان تكسب وقت علق علي حلة مياه كبيره
وتحط فيها شوية ملح وكمون علشان الورق يبقي ريحته حلوه
طبعا هنا الكرمب متقطع مكعبات علشان يريحك وتسيبه يستوي مدة مثلا ٣:٥ دقائق
طبعا على حسب الكرمب
شوفت اللمسات يا كحيانة لازم تطلعه مرصوص كده
علشان تبقى برنسه في نفسك كده ومتزهقش وانتى بتحشي
ورجلك تنمل وتسوط زي اللي جالها طلق مره واحده
دا الورق مرصوص رصة ست البنات وهي مدلعة في مطبخها
دا بصل قطعه قطع صغيرة علشان وانت بتلف ميتعبكش
هوب البصل في الزيت وعلي عليه النار علشان تعمل زيطه كده في المطبخ علشان تحس احساسي يا كحيانه
هنا البصل أخد لون شفاف كده وتحس انه خس وصعب عليك
دي بقا شوية طماطم مبشورين هتعمل ذكي وتقولي طب ليه مش في الخلاط
هقولك علشان أنا كحيانه ومعنديش خلاط
طبعا بما ان طماطم هنا في السعودية تحسها معندهاش دم فبنزود حبة صلصلة
بهاراتك يا مغتربه وزود على اد ماتقدر كل البهارات اللي عندك
حطها وزود شطة علشان الطعم لو طلع وحش الشطة بتوهك شويه
اه كل وانتى جعانة علشان تحس ان الطعم حلو
دي طبعا شبت وأكيد معاه كزبرة
زي بكيزة لازم معاها زغلول وهكذا
نزل الصلصة من على البوتاجاز وحط بكيزة وزغلول(الشبت والكزبرة) والرز وقلب يا معلم
شوية عنوق كده علشان السطر اللي تحت ميشيطش منك يا حب
لو قطعت بصلايه كمان مع الكرنب اللي مقطعه دا ورشيت عليها ملح وفلفل اسمر
شويه صغيرين خالص عشان مايطلع حراق هيدي طعم جميل جدا للمحشي
هنا بقا تنزل بالشوربة مغلية وتمسك الحلة من وسطها كده وتهزها هزة
البنت وهي بتعدل بنطلونها في الشارع
علشان طبعا الشوربة تنزل لآخر سطر
ملحوظه صغيره
بس هو بيتحط طبق مسطح فوق المحشى بعد ما تحط الشوربه تكبس بيه صوابع المحشى
ع طول علشان ميفكش وينفش كده ويتشال بعد ما يتشرب شويه والشوربه
تكون أقل من كده شويه ويتوطى عليه النار تبقى شعله لحد ما يستوى وبالهنا والشفا
أما اللى بيتريقوا على صوابع المحشى إنها كبيره فانتوا مش بتتريقوا على وحده ست مش عارفه
تصغر صوابع المحشى
بل فى ستات أصلا مبتعرفش تعمل محشى الكرنب وفى اللى بتكسل تعمله
اعطوا المحشي حقه يا جماعه
ما ينفعش نهينه كده
علشان المره الجاية أقولكم علي الممبار
الف هنا وشفا يا مغتربه
