سؤال متكرر ،

ليه المواطن مش حاسس بإنعكاس نتيجة الإصلاح الأقتصادي علي حياته برغم إن كل المؤسسات الدولية المتخصصة في الإقتصاد وأولهم صندوق النقد الدولي بيشيد بالإقتصاد المصري ، وأمتي هيحس بالتحسن وبإنعكاس نتائج الإصلاح الإقتصادي علي حياته ومعيشته ؟

سؤال مشروع هحاول الإجابة عليه من غير أرقام ونسب مئوية علشان الإجابة تبقي واضحة للجميع ،
أولاً

مش شرط نتيجة #الإصلاح_الأقتصادي يكون إنعكاسها في صورة إنخفاض أسعار الأكل والسلع!! لأن إنك تمشي في طريق محترم بيقلل من نسبة الحوادث ده إنعكاس إيجابي علي حياتك ،إنك تركب قطار أو وسيلة مواصلات محترمة عموماً تحافظ علي حياتك وتحفظ أدميتك فده إنعكاس إيجابي علي حياتك ، إنك تتعالج من الأمراض المزمنة بحملات طبية بتتكلف مليارات ومن فيروس سي لو كنت مصاب فده إنعكاس إيجابي علي حياتك ، إن يتبني مصانع ومشروعات عملاقة في بلدك إبنك يشتغل فيها فده إنعكاس إيجابي علي حياتك .
ثانياً

المواطن وخصوصاً الشباب مع ظهور الإنترنت أصبح بيقيس الموضوع بطريقة خاطئه ومبقتش متطلباته زي زمان أنه يادوب عايز ياكل ويشرب ويخرج يتفسح علي الكورنيش في ال Week end ، المواطن دلوقتي وخصوصاً فئة الشباب بقي عنده تطلعات وأصبح مقياس التحسن بالنسباله أنه لازم يشتري أيفون أحدث إصدار ،وسمارت واتش ، ولبس من ماركات عالمية، وطبعاً عايز كل ده بأسعار رخيصة برغم إرتفاع أسعار السلع دي عالمياً وبرغم إن الحاجات دي بتقتصر برة علي طبقات وفئات معينة ومش كل الشعب بره لابس ملابس من تصميم جورجيو أرماني أو من تصميم ديور زي مالناس هنا فاكرة !!
المهم إن الشاب لما مبيقدرش يشتري الحاجات دي بيعتقد ان كدة تحسن الإقتصاد لم ينعكس علي معيشته !!
ثالثاً
الحكومة أو الدولة بوجه عام سياستها دلوقتي بتتركز علي بناء البلد وبناء مستقبل بيتلخص في بناء مصانع وشركات وطرق تسهل عملية النقل لما المصانع تشتغل بكامل طاقتها (وده قرار إتأخرنا فيه كتير ومكانش ينفع نتأخر أكتر من كدة) ،
ولما المصانع دي تشتغل بكامل طاقتها المواطن هيحس بالتحسن وهيتحول الإنفاق الحكومي عليها لمكسب هيعود بالنفع علي المواطن زي أي مشروع خاص .
رابعاً
الخريج بيرفض يشتغل أي شغل لأن عنده إعتقاد سببه كلام الإنترنت إن الشباب بره كلهم بيشتغلوا في وظائف عليا لمجرد إن معاه مؤهل عالي!! والحكومة بتوزع عليهم فلوس وده بيخليه يرفض أي شغل يجيله وبيتحول لعبء علي أسرته وبالتالي رب الأسرة مش هيحس بأي تحسن طول ماعنده كائن مستهلك مش منتج زي ده .
خامساً
الزيادة السكانية والإعتقاد الخاطئ إنها ثروة بشرية ،وده كلام خاطئ ونظرية قديمة كانت تنفع في العصور القديمة قبل الكهرباء والتكنولوجيا اللي خلت ماكينة حديثة واحدة بيقف عليها عامل واحد بتقوم بشغل كان بيقوم بيه 100 عامل ، وبالتالي مهما زاد الناتج القومي الزيادة السكانية هتلتهمه والمواطن مش هيحس بأي تحسن طول مالمشكلة دي قائمة .
ومع ذلك وبرغم كل الاسباب دي الدولة بتحارب علشان تخلي المواطن يحس بتحسن أحواله المعيشية وتخليه يحس بإنعكاس إجراءات الإصلاح الإقتصادي عليه ،والرئيس #السيسي بنفسه في أكتر من لقاء وجه الحكومة إنها تبذل كل الجهود في سبيل إن المواطن يحس بتحسن في حياته اليومية ، وبالتأكيد الفترة اللي جاية وخصوصا لما مصر تقوم بتصدير شحنات الغاز اللي هيزيد الطلب علي إستيرادها في فصل الشتاء، ولما المصانع اللي تم إنشائها تشتغل بكامل طاقتها ويتم تصدير منتجاتها لدول أفريقيا بالأخص بعد إعلان الرئيس السيسي بدء سريان إتفاقية التجارة الحرة بين دول افريقيا في 2019، ومع سياسة الرئيس في إعادة فتح المصانع المتوقفة ده هيوفر زيادة في الدخل القومي وقضاء علي البطالة هيخلي المواطن يحس بتحسن ، مع أهم حاجة وهي إجراءات جدية من الحكومة لمكافحة الزيادة السكانية .