طريقة عمل المكرونة المبكبكة الليبية بالصور،مكرونه مبكبكه باللحمه
مكرونه مبكبكه باللحمه
بطريقة مختلفة شويه عن الطريقه الاصليه غدا سريع وقمر وبيخلص في نص ساعه
الطريقه تحت كل صوره زى كل مره ادعولى دعوة حلوة بس
مخى الساعه واحده بليل تيجى نعمل مكرونه مبكبكه
غرقااانه في الصلصة
جمب شويه بطاطس وسلطه ويبقى خلصنا الغدا
اغرف وعيييييش
المكونات
بتاعتنا نص كيلو لحمه ياريت تكون من حته بتستوى بسرعه
زى الفلتو مثلاً ناعمه ومبتاخدش وقت خالص في التسويه
قطعتها مكعبات صغيره وكيس مكرونه صدفه او ممكن اى نوع تفضلوه
أربع كوبايات عصير طماطم او حوالى كيلو طماطم معصوره
مع معلقه كبيره مليانه صلصه والبهارات ملح وفلفل اسود وسبع بهارات ونص معلقه كارى ع كركم ونص بابريكا
أول حاجه هنسخن طاسه جدا ونحط فيها تلات اربع معالق زيت
وننزل باللحمه لازم تعمل تشششش ومش عاوزنها تنزل ميتها
هنشوح ع نار عاليه وبعدين نضيف البهارات ماعدا الملح
ونكمل تشويح قربت تدخل في التسويه هتفرق معاكو نوع اللحمه
لو صغيره هتستوى بسرعه وممكن تستخدمو بتاعه الشاورما
أو البوفتيك ومتقطعه مكعبات صغيره عشان هى اخشن شويه
فى حله هنحمر المكرونه فى معلقتين زيت
لحد ما نوصل للون الدهبى الحلو ده
بعد حوالى سبع دقايق كانت مستويه بنسبه ٨٠٪ وكنت مغطياها في الوقت ده
هنضيف المكرونه
ونقلب كويس ونحط الملح دلوقتي
وعصير الطماطم
ونزود شوربه أو ميا
لحد ما نغطى المكرونه واللحمه وزودوها كده عشان تبقى جوسى
ونغطيها بغطا الحله ونسيبها ع نار عاليه
أول ما تبكبك كده هنهدى النار لحد ما تستوى
بتاخد حوالى ربع ساعة ل عشرين دقيقة وبتبقى تمام
وبس خلاص
