حلويات

طريقة عمل الكنافة بالقشطة زي المحلات،كنافة بالقشطة الكدابة فاطمة أبو حاتي

كنافه نابلسيه و بالقشطه الكدابه كمان بكل تكاتها و حراكتها بالتفصيل

عملت مكس بين الاتنين و طلعت حلوه جداا و اللى مش حابب يعمل مكس بينهم مفيش مشكله يقدر يعمل كل واحده لوحدها

اولا : مقادير القشطه الكدابه و طريقتها

2 كوب لبن + كيس كريم شانتيه بودر 50 جرام + معلقه نشا كبيره مليانه نقلبهم بمضرب سيلك يدوى لغايه مايختلطوا و بعدين نحطهم على نار وسط لغايه الخليط مايتقل و يربط معانا …
و نركنهم على جنب يبردوا للحشو .

ثانيا : مقادير الشربات و الطريقه ( الشربات وسط )

2 كوب سكر + كوب و ربع مايه + معلقه سمنه بلدى + معلقه عسل نحل كبيره
او معلقه جلوكوز حسب اللى متوفر عندك + 1/2 ليمونه .
*** نحط السكر مع المايه على نار هاديه بدون تقليب لغايه السكر مايدوب لوحده وبعد السكر مايدوب نضيف ال 1/2 ليمونه و معلقه العسل و معلقه السمنة و نعلى النار شويه عشان الخليط يغلى و نقلبهم كويس و نسيبهم يغلوا 5 دقايق و نطفى عليهم و نسيبه يبرد

ثالثا : طريقة الكنافه ( مقاس الصينيه 26 )

1 – نطلع الكنافه من الفريزر و نفرفتها بأدينا لغايه ماتبقا ناعمه جدا .
2 – نضيف عليها كوب سمنه بلدى سايح بدرجة حرارة المطبخ و نقلبهم لغايه السمنة ماتتخلل و تغلف الكنافه كويس .
3 – نضيف معلقه كبيرة سكر بودره و نقلبها كويس بتدى لون حلو للكنافه .
4 – ندهن الصينيه سمنه و نحط نص الكنافه و نضغط كويس اوى عليها .
5 – نحط القشطه الكدابه و نوزعها بعيدا عن الاطراف .
6 – نحط الجبنة الموتزاريلا و نوزعها فوق القشطه الكدابه بعيد عن الاطراف
7 – نحط باقى الكنافه على الوش و نوزعها كويس و نضغط بالراحه و نساويها
8 – نرش شويه سمنه سايحه على وش الكنافه .
9- ندخلها فرن سخن نكون مولعينه قبلها ب 10 دقايق على الشبكة فى النص
على درجه حراره 180 لمده نص ساعه .
10 – لما نلاقى الاطراف لمت و لونها بقا اصفر دهبى نطفى تحت و نولع الشوايه اللى فوق لمده 5 دقايق تاخد لون دهبى من فوق بس نبقا ننزل الصينيه درجه لتحت عشان الشوايه ماتحرقش وش الكنافه .
11 – نطلع الصينيه و نسقيها الشربات بارد و الكنافة سخنه .

كنافه نابلسيه و بالقشطه الكدابه

Salicia

توكل على الله واترك أمرك له، فمن رعاك وأنت صغير سيرعاك وأنت كبير 🙏 😉
زر الذهاب إلى الأعلى