حبايبى الحلوين اخباركم ايه يا رب تكونوا بخير
الغريبه كما يجب أن تكون
ما شاء الله اللهم بارك شايفين الجمال
اه يا ناعمه يا غريبه
بجد طعم و ريحه و لون و نعومه ماحصلتش
هى السهل الممتنع بس ناخد بالنا من كل التفاصيل الصغيره لأنها حقيقى بتفرق
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
الغريبه الناعمه الدايبه بالطريقه الاصليه
دى اسهل طريقة للغريبه الطريقه التقليدية اللى كلنا عارفينها بثلاث مكونات بس
و من غير بياض بيض و ما شاء الله بتدى احسن نتيجه و ناعمه بشكل خرافي برضو
ليها شويه ملاحظات علشان تظبط معانا طبعا تقدروا تضاعفوا الكميه براحتكم
الكميه دى عملتلى الصاج المتوسط داه و دايما بقولكم جربوا فى مقدار صغير
و لو ظبطت معاكم تقدروا تضاعفوا الكميه براحتكم
مقاديرالغريبة الناعم في البيت :
كوب سمنه يفضل بلدى و لازم تكون ساقعه من الثلاجه
نصف كوب سكر بودره منخول
رشه ملح
٢ كوب دقيق كحك و بسكويت أو جميع الاغراض منخول
انا هنا بفضل انخل الدقيق و السكر البودره علشان تبقى ناعمه و مفيهاش اى حبيبات من السكر أو الدقيق
الغريبه الدايبه الناعمه بطريقتها الاصليه بثلاث مكونات فقط
طريقة الغريبة الناعمة الدايبة بالطريقة الأصلية المجربة :
هنجيب بوله و نحط فيها السمنه الساقعه و السكر البودره و نضربهم كويس اوى بالمضرب الكهربائى
أو بالمضرب السلك اليدوى لغايت لونهم ما يفتح و يهيشوا و يبقى قوامهم كريمى
و بعدين هنضيف الدقيق اللى حاطين عليه الملح و كالعاده فى كل حاجات العيد مش بنعجن
و خصوصا الغريبه علشان ماتنشفش مننا و تبقى ناعمه و دايبه و العجينه بتبقى ناعمه
لكن ملمومه و مش بتلزق و هنغطيها و ندخلها الثلاجه لمده نصف ساعة
علشان تتماسك و نعرف نشكلها و نيجى بقى للملاحظات المهمه لازم نختبر واحده الأول
نشكل واحده على شكل كوره صغيره و نخبزها و نشوف لو تمام مظبوطه أو حصلت مشكله نعالجها طبيعى
انها تفرش حاجه بسيطه لكن مش بزياده أو تسيح خالص فلو لقيناها فرشت جامد يبقى السكر
كان كتير أو العجينه سخنت مننا و احنا بنشتغل فيها فالسمنه ساحت فنحاول نزودلها معلقه دقيق
كده و نشوف علشان نظبط قوامها و خدوبالكم اختاروا نوع دقيق كويس لأن فيه انواع سيئة كتير
بتطرد السمنه و لو طلعت تمام معانا يبقى هنكمل تشكيل و يفضل الخبز على ورق زبده
و يا ريت ندخلها الثلاجه حوالى ١٠ دقايق قبل الخبز علشان تفضل محافظه على شكلها
و ماتفرش جامد مننا طبعا بنخبزها فى فرن سخن على الرف اللى فى النص على درجه حرارة 150
مش بتاخد وقت خالص يدوب من ١٠ إلى ١٥ دقيقة أو حسب الفرن
طبعا مش لازم تاخد لون من اى ناحيه بندخلها بيضاء و تخرج بيضاء زى ما هى و بنلاقيها بتتحرك
و مش لازقه فى الصينيه خدوبالكم لو درجه الحراره عاليه هتشقق و ما تطولوش عليها علشان ماتنشفش
و لو الدقيق كان كتير برضو ممكن تشقق و طبعا اول ما تخرج من الفرن بنسيبها زى ما هى على الصينيه
و اوعوا تلمسوها أو تحركوها لأنها بتبقى ناعمه جدا و ممكن تبصم من ايديكم و تتفرفت منكم
غريبه العيد الناعمه الدايبه بالطريقه الاصليه المجربه ناجحه …
كيفية عمل الغريبة الناعم في البيت
