حلويات

طريقة عمل الارز باللبن زى المالكى،سر الارز باللبن بتاع المحلات

حبايبى الحلوين اخباركم ايه يا رب تكونوا بخير
دعواتكم بقى النفسيه بقالها فتره مش متظبطه
و مشاكل كتير حقيقى تعبت ربنا يعديها على خير و يصلح حالنا جميعا يا رب
جيبالكم بقى حاجه كلنا بنحبها و ترطب علينا فى الجو داه
ما شاء الله اللهم بارك شايفين الجمال

الارز باللبن الكريمى خالص بيدوب دوب بالفم وتحدى

شويه أرز بلبن قمر يستاهلوا بوقكم

شايفين اللون و القوام كريمى ازاى

عايزه اقولكم المفاجأة
انه ب 3 مكونات بس و من غير اى افتكاسات خالص

سر عمل الأرز باللبن

طبعا فيه مليون طريقه للارز باللبن
بس يمكن دى اكتر طريقه بحبها و فعلا من أجمل ما يكون
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه
الأرز بلبن الكريمى عادى و فرن ب3 مكونات بس على طريقتى

المقادير :

طبعا كل واحد و ليه طريقته و كلهم حلوين و مفيش صح و غلط الفكره كلها
فى الطعم اللى كل واحد بيفضله انا شخصيا و لا بسلق الأرز
و لا بحط نشا بعتمد على النشا اللى فى الأرز و بحبه يبقى شارب من اللبن اكتر
ما يتسلق و بعدين اسويه فيه أهم حاجه و أساس الوصفه هو اللبن
لازم تستخدموا لبن دسم و بخيره علشان يبقى فيه قشطه منه فيه
و يديكوا طعم غنى و كريمى للارز بلبن علشان ماتحتاجوش تضيفوا كريمه أو قشطه

مكونات أرز باللبن :

لتر / كيلو لبن كامل الدسم و يفضل بلدى بخيره علشان القشطه
نصف كوب ارز مصرى يدوب بنغسله غسله سريعه
علشان محتاجين النشا اللى فيه و طبعا فيه انواع مش بتتغسل بتستخدم على طول
و دى هتكون كويسه علشان ساعتها هنستخدم الأرز على طول
و نحافظ على كل النشا اللى جواه
سكر للتحليه حسب الرغبه
فانيليا
نصف باكو كريم شانتيه أو م ك مليانه كريم شانتيه خام
قشطه بلدى بتاعت وش اللبن بنحتاجها للارز بلبن فى الفرن
إضافات حسب الرغبه يمكن الاستغناء عنها دى لتعزيز الطعم و القوام
و فى حاله ان اللبن مكنش دسم كفايه و انا شخصيا بكتفى بالمكونات الاساسيه فقط
نصف كوب لبن اللى هو الحليب بارد هندوب فيه م ك لبن بودرة و م ك قشطه بلدى
و م ك آيس كريم بودره و م ك نشا لو عايزين قوامه يكون متماسك اكتر و كوب كريمه خفق للحلويات السايله

التزيين :

حسب الرغبه
مكسرات مجروشة
زبيب و جوزهند

الطريقة :

هنجيب حله و نحط فيها اللبن و نغليه و بعدين هنطفى عليه و نحط عليه الأرز
و نغطيه الفكره من نقع الأرز فى اللبن المغلى انه بيتشرب من اللبن
و بيسرع من سواه و بيبقى طعمه حلو اوى ممكن تنقعوه من نصف ساعه
لغايت ساعتين كل ما قعد اكتر كل ما كان احسن و بعدين هنرفعه عالنار
مع التقليب المستمر على نار هاديه و طبعا بنضيف السكر فى الاخر و الفانيليا
و الكريم شانتيه و لو حابين تضيفوا الإضافات اللى قولت عليه هتضيفوها فى الاخر
برضو بحيث تاخد كام غلوه معاه هياخد حوالى ربع ساعه لأننا نقعناه
طبعا كتير فى اللبن و النشا اللى اصلا فيه هى اللى هتخلى قوامه يتماسك
و مش بيحتاج نشا زياده و طبعا براحتكم

أسرار عمل الرز بلبن زي المحلات كريمي وزي القشطة

طريقة عمل الارز باللبن مثل المحلات

yasmen

كما شهرزاد.. حكت لتُبقي نفسها على قيد الحياة، أكتبُ لأبقِى نفسي على قيد الحياة. إنّني مع كلّ نصٍّ أكتبه أكتشف حقيقة أخرى مخبأة في داخلي.
زر الذهاب إلى الأعلى