طريقة البسبوسة بالتفصيل بكل تكاتها و حراكتها
مقادير البسبوسه مقاس الصينيه ( 26 )
2 كوب سميد بسبوسه ناعم ( خام ) + 3/4 كوب سكر + 1 كوب سمنه بلدى سايح + 2 علبة زبادى صغيره ( 105 جرام العلبه ) + معلقه صغيره بيكنج بودر + معلقتين كبار جوز هند ( اختيارى ) .
مقادير الشربات : ( خفيف و سخن مولع )
1 كوب و ربع سكر + 2 كوب مايه + كيس فانيليا صغير + معلقه كبيره عسل نحل + معلقه سمنه + 1/2 ليمونه بعد الغليان و نطفى عليها .
الطريقة
1 – نخلط السميد + السكر + جوز الهند + البيكنج بودر ونقلبهم كويس .
2 – نضيف السمنه السايحه و نقلبهم مع بعض بطراطيف الصوابع من تحت لفوق لغايه مايبقوا زى الرمله المبلوله
( بدون عجن ) ( صوابعك تبقا مفتوحه )
3 – نضيف الزبادى و نقلب بردوا بطراطيف الصوابع من تحت لفوق حتى يمتزج الخليط
( صوابعك بردوا مفتوحه ) ( بلاش نعجنها عشان ماتبوظش منك ) .
4 – نحط الخليط فى صينيه مدهونه سمنه او زيت و نخبطها على الترابيزه خبطتين و نبل ادينا مايه ونساويها من فوق و نبل ادينا و نساويها و هكذا لغايه ما تبقا ناعمه و مفيش فيها اى تشققات .
5 – ندخلها الفرن اللى هنكون مولعينوا قبلها ب 10 دقايق على درجه حراره 180
على الشبكه فى النص لمده من 30 الى 35 دقيقه .
6 – لو الوش ما احمرش اطفى تحت وولعى الشوايه دقيقتين تاخد لون .
7 – هنسقيها الشربات سخن و البسبوسه سخنة .
8 – هنغطي الصينيه بغطا معدن و ندخلها الفرن تانى و هو مطفى طبعا 10 دقايق عشان تبقا طريه .
ملحوظة :
حطيت الصورة بتاع نوع السميد الخام اللى استخدمته هتلاقوه فى كارفور او هايبر او الماركتات الكبيره
و ممكن نستعمل سميد سايب ناعم بس ده جودته عاليه و كمان مغلف .
