حبايبى الحلوين اخباركم ايه يا رب تكونوا بخير
جيبالكم بقى وصفة تجنن
العشق اللى بجد الشاااااااورما
ما شاء الله اللهم بارك شايفين الجمال
لا تقولولى جاهز و لا غيره البيتى و بس
كل اللى جرب طريقتى الحمدلله عارف انها زى الجاهزه و احلى كمان
كله بيتى من اول البهارات و التتبيله لغايت العيش و مانسناس كمان الفته الجباره
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
شاورما اللحمه البيتى الاصليه على طريقتى مع فته الشاورما و خبز الصاج البيتى الاصلى
المقادير :
بهارات شاورما اللحمه البيتى الاصليه
هناخد معلقه كبيره من كلا من
كمون ناعم
حبهان بودره
كركم
قرفه و قرنفل
فلفل اسود
كزبره ناشفه
هنحطهم كلهم على بعض و نقلبهم كويس و نحتفظ بيهم فى بطرمان نظيف و محكم الغلق
لتتبيله الشاورما :
كيلو لحمه بوفتيك أو من وش الفخده متقطعه شرائح طوليه اللى هى تقطيعه الشاورما
و ممكن تضيفوا معاها قطعه دهن بتديها طعم حلو اوى
علبه زبادى كبيره وزن الواحده حوالى ١٦٠ جرام
٤ م ك زيت
٢ م ك خل
٢ م ك عصير ليمون
م ص ثوم مفروم
نصف م ك من كلا من فلفل اسود و بابريكا و جنزبيل بودره
م ك من بهارات الشاورما البيتى بتاعتنا
مجموعة من البهارات الصحيحه عود قرفه خشب و كام فص حبهان و ورق لورا
م ك ملح أو حسب الرغبه
كام معلقه زيت للتسويه
مجموعه خضروات بصل و طماطم لحم بدون البذر متقطعين جوليان أو جوانح و بقدونس مفروم
صوص الزبادى بالطحينه
علبه زبادى كبيره وزن الواحده حوالى ١٦٠ جرام
من ٢ إلى ٤ م ك طحينة خام
ملح و فلفل
خل و عصير ليمون
كام فص ثوم مفروم
عيش لبنانى محمص للفته
الطريقة :
هنجيب بوله و نحط فيها كل مقادير التتبيله و البهارات الصحيحه و نقلبهم كويس مع بعض و بعدين
نضيف قطع اللحمه و نغلفها بالتتبيله كويس اوى و نغطيها و بندخلها الثلاجه ليله كامله و تانى يوم
بنشيل منها البهارات الصحيحه و نجيب طاسه و نحط فيها شويه زيت و نسيبه يسخن كويس اوى
و بعدين بننزل بالشاورما و مش بنقلبها خالص عايزينها تاخد لون و صدمه حلوه و بعدين نبدأ نقلبها
طبعا هتنزل المياه بتاعتها و تشربها و مش بتاخد وقت خالص فى السوا بلاش تطولوا عليها علشان
ماتنشفش و تشد و فى اخر مرحله قبل ما نطفى النار هنضيف البصل و الطماطم يدوب كام تقليبه
و خلاص احنا مش عايزينهم يدبلوا و بعد ما نطفى النار
بنضيف البقدونس المفروم و علشان نجهز السندوتشات
هنجيب خبز الصاج البيتى بتاعنا و ندهنه بشويه من صوص الزبادى بالطحينه و نحط عليه الشاورما و ممكن كام
واحده بطاطس محمره و نلفه و بنخلص الكميه كلها و بعدين علشان نديهم اللون الحلو هنجيب جريل
أو طاسه و ندهنها زيت بسيط و نسخنها كويس و نحط السندوتشات بحيث تاخد لون حلو من الناحيتين
و بالهنا و الشفا
