حبايبى الحلوين اخباركم ايه يا رب تكونوا بخير
جيبالكم بقى وصفة عيش تجنن
ما شاء الله اللهم بارك شايفين الجمال
شايفين هش و يجنن ازاى و لا اللون بقى
أظن الصور بتتكلم لوحدها
و قولوا باى باى لﻷفران
بجد عجينه روعه هش و ناعم و يتأكل حاف من حلاوته
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه
خبز الزبادى الرهيييييب على طريقتى
المقادير :
المقدار داه بيعمل كميه كويسه و طبعا تقدروا تضاعفوا الكميه براحتكم
نصف كيلو دقيق بيتزا و مخبوزات او جميع الاغراض يعنى حوالى من ٣ و ١/٢ إلى ٤ كوب دقيق
م ك خميرة فورية
م ص سكر
علبه زبادى كبيره وزن الواحده حوالى ١٦٠ جرام يعنى حوالى ثلاث اربع كوب
ملح
كوب و ربع ماء دافئ أو لبن اللى هو الحليب دافئ أو خليط من الاتنين
و داه اللى انا عملته للعجن اكتر أو اقل حسب العجينة ما تلم معانا
خليط دهان الوجه :
صفار بيضه و شويه لبن و رشة قهوه سريعة الذوبان أو كام نقطه خل
للوجه :
سمسم و حبة البركة
الطريقة :
هنجيب بوله و نحط فيها شويه من اللبن و المياه الدافيين و الخميره و السكر
و نقلبهم كويس و نغطيهم و نسيبهم ربع ساعه يتفاعلوا مع بعض و بعدين
هنضيفلهم الزبادى و نقلب و بعدين هنضيف الدقيق اللى عليه الملح بالتدريج بالتبادل مع اللبن و المياه الدافيين
لغايت العجينه ما تلم معانا و تبقى ناعمه و ملساء و لازم نعجنها كويس مش اقل من ٧ دقايق
و بنغطيها و بنسيبها تخمر لغايت ما يتضاعف حجمها و بعدين بناخدها و بنقسمها لكور حسب حجم الرغيف
اللى احنا عايزينه و بنغطي الكور و نسيبهم يرتاحوا حوالى ربع ساعه و بعدين بناخد كل كوره
و نفردها بشكل دائرى و بنخلص الكميه كلها و بنسيبهم يرتاحوا مره كمان قبل الخبز حوالى نصف ساعه
و بنغطيهم علشان وشهم ماينشفش و بعدين بندهنهم بخليط الدهن بالراحه
علشان ما نوقعش التخمير و نرش عالوش سمسم و حبه البركه و ندخلهم فرن سخن على الرف
اللى فى النص و ممكن عالصاجه برضو عادى بس ناخد بالنا علشان مايتلسعش مننا على درجه حرارة 200
لغايت ما يستوا و ينتفخوا و ياخدوا لون حلو و لو عايزين العيش طرى اول ما يطلع
من الفرن بنديله كام بخه مياه و نغطيه بفوطه نظيفة و لو عايزينه مقرمش
يبقى مش هنغطيه و بعد ما يبرد بنحتفظ بيه فى أكياس بلاستيك محكمه الغلق
و بالهنا و الشفا
طريقة عمل طريقة عمل خبز الزبادي
خبز الزبادي الطري
