عجائن ومخبوزات

بسكويت مالح بالجبنة بطريقة سهلة وطعمه تحفة

طريقة بسكوت مالح

حبايبى الحلوين اخباركم ايه يا رب تكونوا بخير
جيبالكم بقى وصفة تجنن
شويه بسكوتات مالحه تستاهل بوقكم و هتعجب كبار و صغيرين

بسكوت مالح خفيف

ما شاء الله اللهم بارك شايفين الجمال

شايفين ازاى هش و مفرغ من جواه
عايزه اقولكم هش جدا و مقرمش و فى نفس الوقت بيدوب و لا الريحه
مش قادره اوصفلكم بقى هتجيب اخر الشارع حاجه كده ماحصلتش وهم بجد
و سهل جدا و يتشكل بالسكينه عادى و لا قطاعات و لا غيره
و من غير بيض و تقدروا تفننوا فى النكهات و الحركات بقى براحتكم
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه

بسكويت مالح بالجبنه هش و مقرمش بنكهات مختلفه و مميزه جدا

المقادير :

نصف كوب إلا معلقه كبيره زبده طريه بدرجة حرارة الغرفة أو ٧ معالق كبار
م ك سكر
٢ م ك زيت
ملح
م ص بيكنج بودر
نصف كوب جبنه مبشوره اى نوع تحبوه رومى أو شيدر أو جوده
٢ كوب دقيق و عليهم معلقتين كبار كمان دقيق طبعا دقيق بسكويت أو جميع الاغراض
اقل من ربع كوب مياه بنضيف المياه بالتدريج لغايت العجينه ما تلم معانا

لدهان الوجه :

لبن اللى هو الحليب

للوجه :

سمسم و حبة البركة و زعتر ناشف و كمون و بابريكا

الطريقة :

هنجيب بوله و نحط فيها الدقيق و الزبده و لازم نفركهم بإيدنا كويس اوى
مع بعض بحيث كل حبيبات الدقيق تتغلف بالزبده كويس اوى و بعدين هنضيف
باقى المكونات الملح و البيكنج بودر و الزيت و السكر و الجبنه المبشوره
و نقلبهم كويس مع بعض و بعدين هنضيف المياه بالتدريج معلقه معلقه لغايت العجينه
ما تلم معانا طبعا مش بنعجن علشان البسكويت ما ينشفش مننا
احنا يدوب بنلم العجينه و بعدين هنغلفها بكيس بلاستيك أو بلاستيك راب
و ندخلها الثلاجه لمده نصف ساعة علشان ترتاح و تتماسك و نعرف
نشكلها و بعدين هنفردها بسمك اقل من المتوسط ما بين ورقتين زبده
أو كيسين بلاستيك و نقطعها بالسكينه عادى خالص

أو بعجله البيتزا المشرشره مثلا و لو متوفر عندكم قطاعات تمام براحتكم
و بنخلص الكميه كلها و بنرصهم على صينية الخبز على ورق زبده
أو ندهن الصينيه دهنت زيت خفيفة و بندخلهم الثلاجه يدوب ١٠ دقايق
قبل الخبز علشان الزبده ترجع تسقع و تمسك نفسها تانى و يفضل محافظ

على شكله أثناء الخبز و بعد كده بنخرجهم من الثلاجه
و بندهن وشهم باللبن و نرش عالوش النكهات و بندخلهم فرن سخن على الرف
اللى فى النص على درجه حرارة 160/170 لغايت ما يستوا و ياخدوا لون حلو
من الناحيتين بياخدوا من ١٥ إلى ٢٠ دقيقه طبعا حسب الفرن
احنا لازم تبقى عنينا عليه علشان مايتلسعش مننا و اول ما نطلعهم من الفرن
بنسيبهم زى ما هما على الصينيه لغايت ما يبردوا تماما لأنهم بيكونوا ناعمين اوى
و ممكن يتفرفتوا مننا و بعد ما يبردوا خالص بنحتفظ بيهم فى علبه محكمه الغلق
و بالهنا و الشفا

yasmen

كما شهرزاد.. حكت لتُبقي نفسها على قيد الحياة، أكتبُ لأبقِى نفسي على قيد الحياة. إنّني مع كلّ نصٍّ أكتبه أكتشف حقيقة أخرى مخبأة في داخلي.
زر الذهاب إلى الأعلى