بسكويت الكيس بالنشادر و البرتقال و الشيكولاته

اخباركم ايه يا حلوين يا رب تكونوا بخير
طبعا ماينفعش ننسي تؤام الكحك البسكوييييييت
ما شاء الله اللهم بارك شايفين الجمال
شويه بسكويت بقى يستاهلوا بوقكم

نشادر و برتقال و شيكولاته يعنى موضوع من الاخر

كلهم احلى من بعض طعم و ريحه و هشاشه و قرمشه ماحصلتش
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه

بسكويت العيد / بسكويت الكيس بالنشادر و البرتقال و الشيكولاته البيتى

الطريقه بالتفصيل اسكرين مع الصور

طبعا انا نزلت بسكويت النشادر و البرتقال كتير قبل كده و هتلاقوا طريقتهم اسكرين فعلشان
كده هنزلكم بسكويت الشيكولاته علشان داه الجديد معانا

بسكويت الشيكولاته الهش جدا
المقادير :

كوب زبده طريه بدرجة حرارة الغرفة
٣/٤ كوب سكر بودرة منخول
رشه ملح
فانيليا
بيضه كبيره بدرجه حراره الغرفه علشان لو ساقعه هتخلى الزبده تخرز مننا
٢/٣ ثلثين كوب نشا
١/٣ كوب كاكاو خام و الثلث كوب يعنى اكتر من الربع بمعلقه كبيره
كوب و ثلاث اربع كوب دقيق كحك و بسكويت أو جميع الاغراض
م ك لبن اللى هو الحليب بدرجه حراره الغرفه
و خدوبالكم النوع داه من غير بيكنج بودر خالص لكن بيبقى هش بشكل رهييييييب
و مش مستحمل قطمه بسبب النشا و الحلو فيه انه و لا بيفرش و لا بينفش و لا شكله بيتغير
أو النقشه تروح بيطلع زى ما بندخله بنفس الرسمه

الطريقة :

هنجيب بوله و نحط فيها الدقيق و الملح و النشا و الكاكاو الخام و نقلبهم كويس و نسيبهم على جنب
و فى بوله تانيه هنحط الزبده و السكر البودره و نضربهم بالمضرب الكهربائى أو بالمضرب السلك اليدوى
لغايت لونهم ما يفتح و يهيشوا و يبقى قوامهم كريمى و بعدين هنضيف البيضه و الفانيليا
و معلقه اللبن و نضرب كويس و بعدين هنضيف الدقيق اللى حاطين عليه باقى المكونات
و هنقلب بمعلقه خشب أو سباتيولا لأن طبعا البسكويت مش بيتعجن علشان يبقى ناعم و بيدوب معانا
و فى نفس الوقت فى سنه قرمشه و هش و حلو العجينه قوامها متوسط طبعا مش سايله
و لازم تكون بتلزق علشان نعرف نشكلها بالكيس بسهوله بنخلص التشكيل و يفضل يتخبز على ورق زبده
بيدخل فرن سخن على الرف اللى فى النص على درجه حرارة 160 بياخد من ١٥ إلى ٢٠ دقيقه حسب الفرن