طريقة عمل القشطة الكدابة للكنافه
حبايبى الحلوين اخباركم ايه
الكنافة الراعى الرسمى للحلويات فى رمضان
ما شاء الله اللهم بارك شايفين الجمال
القشطة الكدابة للكنافه
و قولوا باى باى للجاهز
طعم و لون و ريحه و لا القشطه يا نهااااارى إجرام
و اللى هيقول دى قشطه كدابه هزعل منه
دى مش اى قشطه دى وصفتى المعتمده لقشطه الحلويات يعنى مش مجرد مهلبيه و خلاص
بجد من أجمل أنواع الكنافة اللى ممكن تعملوها
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه
الكنافة بالقشطة البيتى الناعمة الفاخرة على طريقتى
المقادير للكنافه :
نصف كيلو كنافة متفرزه من قبلها بليله على الاقل و ياما نفركها بإيدنا أو فى نضربها فى الكبه
أهم حاجه تكون ناعمه جدا زى ما باين فى الصور كأنها بودره
كوب سمنه سايحه أو زبده سايحه حسب المتوفر
٢ م ك سكر بودره
الشربات :
شربات بارد متوسط السمك علشان تبقى فيها ينهي قرمشه لكن فى نفس الوقت برضو طريه و حلوه مش محجره
٢ كوب سكر
١ و ١/٢ كوب مياه
عصير ليمون
بنجيب كسروله و نحط فيها السكر و المياه من غير ما نقلبهم و اول ما يغلوا بنضيف عصير الليمون
و يدوب نسيبه يغلى حوالى ٤ أو ٥ دقايق لغايت ما يبقى متوسط السمك
للقشطه البيتى الناعمة الفاخرة
هنعملها على مرحلتين :
- المرحله الأولى :
لتر و نصف لبن يفضل طبعا يكون كامل الدسم علشان يدينا نتيجه كويسه و القشطه
بتاعتنا تكون غنيه و كل لتر لبن بياخد ٣ م ك خل يعنى هنا هنحتاج ٤ و ١/٢ م ك خل
الفكره كلها اننا عايزين نقطع اللبن كأننا بنعمل جبنه بالظبط هنحط اللبن فى حله عالنار
و اول ما يبدأ يعمل فقاقيع على الجوانب و يبقى خلاص هيبدأ يغلى بنضيف الخل
و خدوبالكم التوقيت مهم جدا علشان اللبن يقطع معانا هنقلب هنلاقى اللبن قطع
و بقى فيه عندنا الشرش لوحده و الجزء اللى زى الجبنه داه لوحده هناخده و نحطه فى بوله على جنب
و نسيبه يهدى شويه و فى الوقت داه هنجهز المرحله الثانيه اللى هى مهلبيه
- المرحله الثانيه :
نصف لتر لبن يفضل يكون كامل الدسم
م ك سكر
نصف كوب نشا
فانيليا
هنحطهم فى حله و ندوبهم مع بعض عالبارد و نرفعهم عالنار مع التقليب المستمر لغايت ما يبقى عندنا مهلبيه
متوسطه السمك هناخدها هى و الجزء اللى زى الجبنه اللى طلع معانا من قطع اللبن و نضربهم فى الخلاط
أو بالهاند بلندر لغايت ما ينعموا تماما و كده القشطه تبقى تماما هنحطها فى طبق و نغطيها بكيس بلاستيك
أو بلاستيك راب و اهم حاجه يكون ملاصق ليها علشان ماتعملش قشره و بندخلها الثلاجه
لغايت ما تسقع تماما علشان نعرف نحشي بيها
الطريقة :
هنجيب بوله و نحط فيها الكنافة بعد ما فتتناها و بقيت ناعمه جدا
و هنحط عليها السمنه أو الزبده السايحه و نفركها بيها كويس لغايت ما تتغلف بيها تماما
و بعدين هنضيف السكر البودره و نخلطه كويس معاها و بعدين هنجيب الصينيه اللى هنسوى فيها
و ندهنها بالسمنه كويس اوى أو الزبده طبعا
طريقة عمل كنافه بالقشطه زي محلات الحلويات المشهورة
