حبايبى الحلوين اخباركم ايه يا رب تكونوا بخير
ربنا يزيح هذا البلاء و يسترها علينا جميعا يا رب و يجعل أيامنا كلها فرح و سعاده يا رب
جيبالكم بقى الكحك من الاخر
افكار نقش الكعك بدون منقاش
ما شاء الله اللهم بارك شايفين الجمال
إن شاء الله الموضوع داه يعجبكم و يفيدكم لانى
جيبالكم ٣ وصفات مش وصفه واحده بس
يعنى كل اللى بتحلموا بيه ان شاء الله هتلاقوه
سخن و عالبارد و زبادى و كله
الكحك هو السهل الممتنع بس امشوا على المقادير بالظبط و خدو بالكم من التكنيك
و ان شاء الله تعملوا
أحلى كحك فى البيت
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه
الكحك البيتى بطرق و أشكال مختلفة
عايزه أوضح كام نقطه طبعا كل واحد و ليه طريقه و كل واحد حسب اللى بيحبه طبعا كلنا عارفين
كحك المحلات
بيكون عالبارد و كحك أجدادنا عالسخن و داه بيكون صعب شويه عليا
و على اى حد عنده مشاكل فى المعده بس برضو عملته مخصوص علشانكم
و بصراحه لا يعلى عليه و طبعا كحك الزبادى من الحاجات الجديده
و انا شخصيا بعشقه و طبعا فيه ناس بتكتفى بالخميره و ناس بتحط خميره و بيكنج بودر زى حالاتى
و ناس بتعمله من غير خميره خالص بالبيكنج بودر بس يعنى عايزه اقولكم مفيش طريقه واحده كلنا نمشي عليها
كل واحد و حسب زوقه بس اهم حاجه زى ما قولت التكنيك علشان يطلع زى الفل
و ناجح بإذن الله من أول مره ايا كان طريقته
و نصيحه لو بتجربوا اى وصفه لأول مره جربوا فى كميه صغيره و لو ظبط ضاعفوا بقى براحتكم
كحك المحلات عالبارد
مقادير الكحك البارد :
نصف كيلو دقيق كحك و بسكويت أو جميع الاغراض يعنى حوالى من ٣ و ١/٢ إلى ٤ كوب
ربع كيلو سمنه ساقعه من الثلاجه و عليها معلقة كبيره كمان و يفضل سمنه بلدى
يعنى كوب و ربع و عليها معلقة كبيره كمان
٣ م ك سكر بودره
م و ربع ص خميره فوريه
م ص بيكنج بودر
نصف م ص ريحه كحك و دى اختيارى يمكن الاستغناء عنها أو استبدالها بالفانيليا
م ك سمسم محمص
رشه ملح
نصف كوب إلا معلقه كبيره لبن اللى هو الحليب أو ماء أو خليط من الاتنين على بعض
و داه اللى انا عملته و يكونوا ساقعين
الحشو :
انا هنا استخدمت ملبن و علشان الملبن يفضل طرى و سايح و حلو كده زى ما انتوا شايفين
و لا ينشف و لا يحجر و لا يخرج باره الكحك و يتحرق منكم امشوا على الخطوات البسيطه دى
ربع كيلو ملبن و معلقه كبيره سمنه و اى نوع مكسرات مجروشة تحبوها
هنجيب بوله و نحط فيها الملبن و السمنه و نعجنه كويس بإيدنا عالبارد طبعا
من غير ما نرفعه عالنار
لغايت ما يسيح معانا كده و بعدين هنضيفله المكسرات
و نبدأ نعمل منه كور صغيره
على قد الحشو و نحطهم فى الثلاجه يسقعوا احشوا بيه
و هو ساقع علشان لما يدخل الفرن مايسيحش و يخرج باره الكحك و يتحرق
