الشتا هو موسم التخزين فى الفريزر لي رمضان كل عام وانتم بخير

بسله وتوم وطماطم وخضار محشى وكرنب وسبانخ وجزر وبرتقال وفروالة الخ
من النهاردة ابدئى خزنى هينفعك جدا فى رمضان وحر الصيف أو بتشتغلى أو عندك اطفال الخ

البسله

تتفصص وتتغسل وتتجفف ووتتشال زى ماهى مع الجزر

التوم

قشريه وافرميه فى الكبة وممكن تشيليه فصوص زى ماهى فى اكياس فى الفريزر
وممكن تعملى برطمان عليه قرن فلفل وربطة بقدونس وتخليه لتتبيله السمك والجمبرى
ومتنسيش التوم المفروم تحطى عليه ملح علشان تتطلعى منه بسهوله

الطماطم

اغسليها وقطعيها ارباع وحطيها فى حله مع شوية زيت وملح وسيبيها لحد ماتستوى
وسيبيها تبرد وافرميها وصفيها وشيلى فى اكياس على قد اكلتك لو الطماطم
لونها مش احمر اوووى حطى مغلقه ببريكا

الفراوله

تتغسل وتتشال ورقتها الخضره وتتشال

البرتقال

يتعصر فى العصارة ويتصفى وتحطى عليه كبشة سكر وتشليه

الخضرة

تتغسل وتتجفف وتتقطع وتتشال

الكرنب

يتقطع ويتسلق خفيف ويتشال فى طبق فل أو بلاستيك علشان ميتهريش

ورق العنب

يتمسح ويترص فى طبق فل ويتشال ولما تتطلعيه حطيه فى ميا مغليه يتسقط ويتشال …
لو خزنتيه مسلوق هيتهرى ويتقطع

السبانخ

مع كزبرتها الخضرة تتغسل وتتقطع وتتتشوح فى حله على النار يدوب تم النار
ولونها يزهى كده سيبيها تبرد وشيليها
واى خدمة فى أى سؤال
علقى عشان مجيش اعلقك انتي وهي

بحبكم في الله