عجائن ومخبوزات

البتاو خبز الصعيد من أيام الفراعنة ،مكونات العيش البتاو،طريقة عمل العيش البتاو

هنتكلم النهارده عن العيش البتاو والصعايده

بس هما اللى عارفين بتكلم عن ايه ده وعندنا اسمه بتاو مش مرحرح
مشهور جدا فى الصعيد وهو اقدم عيش من ايام الفراعنه
وخاصة عندنا فى المنيا
يوم الخبيز بيكون يوم فرح عندنا بس للاسف دلوقت بدأ يقل اوى
لان تكلفته عاليه ومراحله كتيره غير انه عايز ستات صحتها جامده ماشاء،الله ومش مدلعه وخيبانه
اتنين بيعجنوا ووحده بتقطع العجينه واتنين بيوسعوا ووحده بترمى قدام الفرن بكل حرفه
الستات اللى بتخبز بيكونوا عباره عن سلسله كل وحده بيتكمل التانيه
ومينفعش وحده بس تقوم بالعمليه وحدها
بقينا نستسهل ونجيب العيش العادى

تعالو بقى اعرفكم مكوناته

علشان نخبز عيش بتاو بنحتاج نوعين دقيق
دره وقمح وكمان حلبه
مراحله بقا بنجيب الذره تتحمص فى الفرن البلدى وبعدين
تتطحن ومرحلة التحليل وبنضيف ليها دقيق قمح عادى وبنحمص حلبه وبتتطحن برضه ونضيفها كمان
نسبة دقيق القمح لدقيق الذره بتكون ثلثها
العجينه بتتكون من دقيق دره ودقيق قمح وحلبه مطحونه وملح وميه
اولا بنعجن ووحده بتقطع ووحده بتوسع حته صغيره وترميها لوحده توسعها اكبر وترميها فى الفرن
وهكذا
طبعا بيتخبز فى فرن بلدى اللى هو من الطين
ومش عايزه اقلكم بنولع الفرن بايه
بس هتكلوا اطعم والذ عيش

Raima

اللّهم أني استودعتك بلدي فحفظها يا رب 🇪🇬🌹
زر الذهاب إلى الأعلى