حبايبى الحلوين اخباركم ايه يا رب تكونوا بخير
جيبالكم بقى وصفة تجنن
ما شاء الله اللهم بارك شايفين الجمال

شايفين اللون اللى يجنن

كلنا بنحب الفراخ كبار و صغيرين بس بنزهق و بنحب نجدد فيها
بجد التتبيله دى رهييييييبه الفراخ بتبقى طريه و بتدوب و الطعم بجد وهمى
و لا الأرز الاصفر اللى كلنا بنحبه هنعمله زى المطاعم و احلى كمان
مقادير سهله جدا و بسيطه و نتيجه مضمونه بإذن الله
ان شاء الله تجربوها و تعجبكم و ماتنسونيش فى دعوه حلوه

وراك الفراخ المشويه بتتبيله مميزه جدا مع الأرز الاصفر
المقادير :

انا هنا استخدمت وراك الفراخ حوالى ٤ حجم متوسط و طبعا تقدروا تعملوها بفراخ كامله
وراك فراخ منزوعة الجلد أو بجلدها زى ما تحبوا مغسوله و نظيفه كويس اوى و بالسكينه
هنبدأ نديها تشريحات بالورب كده بحيث بعد التسويه تدينا شكل حلو

لتتبيله :

علبه زبادى كبيره وزن الواحده حوالى ١٦٠ جرام
ملح و فلفل اسود
٢ م ك صلصه طماطم
فصين ثوم مفرومين
خل و عصير ليمون
بابريكا و كركم
جنزبيل بودره و رشه زعتر ناشف
لورا بودره و حبهان بودره
زيت
هنجيب بوله و نحط فيها كل مقادير التتبيله و نقلبهم كويس بحيث كله يمتزج مع بعضه كويس
و هنحط فيها الوراك و نقلبهم كويس مع التتبيله و بنغطيهم و بندخلهم الثلاجه لمده ليله كامله
و تانى يوم بنجيب صينيه يفضل لو مسطحه و بنغلفها بورق فويل مهم اوى علشان الصينيه ماتتحرقش
و بعدين ورق زبده و نديله دهنت زيت و بنرص الأوراك و نديها كام نقطه زيت كده عالوش
و لا بنحط مياه و لا حاجه و بندخلهم فرن سخن على الرف اللى فى النص على درجه حرارة عاليه
اول ١٠ دقايق حوالى 200 و بعدين بنقلل الحراره شويه بنخليها 180 طبعا وقت التسويه
حسب الكميه اللى احنا عاملنها و ماتطولوش عالفراخ علشان ماتنشفش و تشد معاكم و فى الاخر
لو كانت محتاجه لون بتشغلوا الشوايه ثوانى

الأرز الاصفر
المقادير :

٢ كوب ارز بسمتى مغسول و منقوع لمده ربع ساعه و متصفى
لكل كوب ارز بنحتاج
م ك زبده و م ك زيت
م ص ملح
نصف م ص كارى
نصف م ص كركم
بودره زعفران و دى اختيارى
بصله متوسطه مفرومه ناعم
كل كوب ارز بسمتى بياخد من كوب إلى كوب و نصف ماء مغلى حسب نوع الارز

الطريقه :

هنجيب حله و نحط فيها الزبده و الزيت و اول ما يسخنوا هنضيف البصله المفرومة و نديها كام تقليبه
لغايت لونها ما يبقى شفاف و بعدين بننزل بالارز و نديله كام تقليبه برضو و بعدين بنضيف الكارى و الكركم
و بودره الزعفران لو حابين و نظبط الملح بتاعنا و نقلبهم كويس مع بعض بحيث نتأكد ان الأرز
كله اتغلف بباقى المكونات و اخد اللون الأصفر الحلو و بعدين هنضيف المياه المغليه و نسيبه يستوى براحته
و بالهنا و الشفا