طريقة كيك المج على البوتجاز

كيكه المج يا جماعه

ازيكوا يابنات
كيكه المج يا جماعه
اول مرة اعملها ومش اخر مره ان شاءالله وتقريبا مش هعمل كيكه في الفرن تانى
لأن المج أسهل وأضمن وأوفر كتيييير في الغاز

وانا بصراحه كنت مقلقه وهى علي النار وضلت اقنع نفسي انى لو لقيت الكوبايات مفرقعه عادي فداكى يابت
وفدا عيالك بس الحمد لله النتيجه أبهرتنى

طريقة عمل كيكة المج بدون فرن

المكونات

حطيت في الخلاط
(كوب لبن… 3/4كوب سكر…. نص كوب زيت… نص كوب كاكاو خام)
وضربتهم كويس جدا جدا وشيلت كوبايه علي جنب (للصوص)

الطريقة

وحطيت عليهم بيضتين وكيس ڤانيليا ومعلقه خل وضربتهم كويس جدا ونزلتهم علي
(كوب دقيق منخول مع معلقه كبيرة بيكينج باودر وذرة ملح)

وقلبتهم كويس بالمضرب اليدوى في اتجاه واحد وبعدين دهنت الكوبايات زيت
وحطيت فيهم الكيك لحد لنص بس ورصيتهم في حله فيها مايه مغليه توصل لحد ربع الكوبايه بس

وغطيتها بفوطه وحطيت غطا الحله وعلي نار هاااااااديه خالص مافتحيش عليها الا بعد 35 دقيقه
وهتتفاجئى وحطيلها الصوص وبالهنا والشفا وافتحي الصور وشوفي شكلها

وازاى حقنتها بالصوص اشمعنى العيال تطعم وهى لأ