ايه رأيكم فى وصفه من الاخر و خلاص هنقول باى باى لمشاكل الكيكة الإسفنجية
اللهم لك الحمد لما نزلتها من فتره كل اللى جربها نجحت معاه و من اول مره
و لا تقولولى دقيق سبونج و لا محسن جل بالدقيق العادى و بأربع مكونات بس
اسهل طريقة لعمل التورتة الاسفنجية
ما شاء الله اللهم بارك شايفين الجمال
هتعملوا احلى سبونج بيتى و احلى تورته كمان
و اهم حاجه ماتنسونيش فى دعوه حلوه
مقادير تورتة عيد الميلاد :
المقدار داه عمل معايا صينيه الومنيوم مدوره مقاس ٢٠ سم و يكون ليها سور عالى علشان تبقى مرتفعه معانا
٦ بيضات مفصولين و يفضل يكون بيض عادى لأن البلدى هيغير المقدار
كوب سكر عادى مش بودره بس يفضل يكون ناعم الحبيبات و هنقسمها نصف كوب مع البياض و نصف كوب مع الصفار
م ص فانيليا يفضل السائله علشان تقضى على طعم و ريحه البيض
١/٢ م ص خل زياده فى الاحتياط علشان نقضى على اى طعم للبيض
رشه ملح
م ص بيكنج بودر
كوب و نصف دقيق منخول
أسهل طريقة لعمل تورتة عيد الميلاد في المنزل :
هنجيب بوله و ننخل فيها الدقيق مع البيكنج بودر و نسيبهم على جنب و طبعا بما ان معظمنا معندناش
غير مضرب كهربائى واحد فهنضرب البياض الأول و بعدين الصفار لأن العكس لا يجوز ابدا هنجيب
بوله تكون نظيفه و ناشفة تماما و هنحط فيها بياض البيض و رشه الملح و المضرب بتاعنا برضو يكون
نظيف و ناشف تماما و اوعوا اى نقطه صفار تقع فى البياض و الا مش هيرفع معانا لازم تبقوا حرصين جدا
و انتوا بتفصلوا البيض و هنبدأ نضرب البياض هنلاقيه بدأ يعمل رغاوى و لونه يفتح فى المرحله دى هننزل بنصف كوب السكر
بالتدريج و احنا بنضرب لغايت ما نلاقيه لونه بقى ابيض فاتح جدا زى بياض الثلج علامه انه وصل للمرحله المظبوطه
اننا لما نقلب البوله نلاقيه ثابت و مش بيقع و انا قلبت البوله فى صوره شوفوها و فى اخر مرحله من الضرب
قبل ما يتماسك تماما هنضيف نصف معلقه صغيره من الفانيليا و هنسيبه على جنب و فى بوله تانيه
هنحط صفار البيض و نصف معلقه صغيره من الفانيليا و نصف كوب السكر و نبدأ نضرب لغايت ما الصفار لونه يفتح معانا
و نتأكد ان السكر داب تماما و فى المرحله دى هنستغنى عن المضرب الكهربائى .
أسهل طريقة لعمل تورتة عيد الميلاد في المنزل بالخطوات المفصلة
طريقة عمل التورتة المنزليّة
