أطباق رئيسية

طريقة عمل الكشري المصري بالصلصة والدقة باحتراف

الكشررررررى وجماله

ياسلام على شوية كشرى من أيد البت فاطمة يلاه ياعبده
الشطة نااااار بجد مش هزار

الطريقة ياجميلات متبخلوش بلايك بقى

بغسل الحمص والعدس واحط كل حاجة منهم فى حلة يتنقعوا ساعة وارجع اشطفهم
واحط ماية تانى وملح وكمون ويتسلقوا
والرز بشيعرية عادى خالص بس بكتر الشيعرية
والصلصة توم مفروم يتحمر فى شوية زيت وانزل عليهم بشوية كزبرة ناشفة صغيرين اوى
فى طرف المعلقة واطشهم بشوية خل صغيرين واحط عصير الطماطم وملح وفلفل وكمون
وتسلقى المكرونة عادى جدا وتنزليها فى شوية زيت مع ملح وفلفل وكمون تتشوح شوية وتقليبها وتطفى عليها
والدقة فصين توم 5معالق كبيرةخل ولمونتين كباروكمون وفلفل اخضر حار قرن صغير
وملح بسيط اوى وتضيفى كوباية مايه مغلية كبيرة وتقلبيهم
والشطة شوية شطة حلوين بتاع 3معالق كبار مع 4قرون فلفل حار وشوية زيت محترمين وعلى النار
وأول ما يغلوا وتعطسى
تزودى مغرفة واحدة بس صلصة يغلوا غلوة وتطفى عليهم
وطماطم متقطعة صغير وعليها توم مفروم وكمون وملح وخل وتقلبيها وتقدميها معاه
وإذا بتحبى البصل قطعى بصل اسلايز شرائح وتبليه بملح وشوية دقيق ونشا وفى زيت سخن
وحمريه وطلعيه فى مصفاه وبعدين حطيه فى طبق وتحته مناديل بس يتحمر ذهبى مش تغمقيه هيبقى محروق وطعمه ممرر
وبألف هنا
تغرفى الاول الرز وفوقه المكرونة والصلصة وفوقها العدس والبصل والحمص
من على الجناب والشطة والدقة والطماطم المخللة على حسب الرغبة

الكشري المصري بالصور

زر الذهاب إلى الأعلى