تعاليم اغلب الاسر المصرية ( للبنات) زمان
_ ممنوع التاخير برة البيت لبعد الساعة تسعة او عشرة مساءا
_ ممنوع التواجد خارج المنزل لاكثر من اربع ساعات الا اذا كنتي في الجامعة او عند خالتك ،او جدتك او في الشغل
_مفيش حاجة اسمها بنت تبات برة البيت مهما كانت الاسباب ،،الا اذا كانت بصحبة اسرتها
_مالكيش دعوة بحد ومتجبيبش سيرة حد ،عشان محدش يجيب في سيرتك ،،
_البنت ملهاش غير سمعتها ،،حافظي على سمعتك وسيرتك
_بلاش تتمني الشر لحد ، و افرحي لفرح الناس
_اياكي والنميمة وسيرة الناس
_اوعي تكذبي ابدا انتي مش جبانة ، واوعي تخافي وخلي راسك مرفوعة
_متخليش حد يتعدى حدوده معاكي
_متعمليش حاجة من ورة امك وابوكي ،
_اي حاجة تتعمل في الخفاء تبقى غلط .
_مفيش حاجة اسمها ده واحد صاحبي ،، اسمه زميلي ،
وغير متاح ابدا الحديث معاه خارج نطاق الجامعة او العمل
_لازم تفهمي ان فيه فرق بين الشياكة والابتذال والاسفاف
البسي اللي نفسك فيه بدون ابتذال
_عيب و ميصحش تضحكي بصوت عالي في الشارع
_متاكليش وانتي ماشية في الشارع
_لما تقعدي ضمي رجلك ،
_متتكلميش مع راجل متعرفيهوش ، ومتخليش حد ياخد عليكي ،
_اوعي تحكي اسرار البيت لاي مخلوق .
_متصاحبيش البنات اللي اخلاقهم مش زي اخلاقنا
_متتديش رقم تليفونك لشاب ،
_متهزريش مع زميلك ،وخلي بينكم حدود
_اوعي تقولي لفظ وحش او كلمة عيب ،انتي بنت متربية
_ مفيش بنات تنام للظهر ، قومي ساعدي امك
كل التعاليم دي كانت بتتطبق في اغلب الاسر المصرية سواء المسلمة او المسيحية بدون اي تمييز او فرق
التعاليم دي ساهمت في تأسيس شخصية الانثى المصرية وخلتها مميزة عن غيرها وقدرت تجمع بين
الذوق والادب والاخلاق والشياكة والاناقة و القوة والرقة والبساطة وعزة النفس ،
دلوقتي مبقاش المجتمع بيهتم بالتعاليم دي ،اد ما يهمهم ان البنت تحط على راسها ايشارب ،
تلبس الحجاب وبعدها تعمل اللي هي عايزاه بقى
ملحوظة ،، انا مش ضد ان البنت تختار بكامل ارادتها تكون محجبة،، لا اطلاقا بالعكس بدعم حقها ايا كانت اختياراتها
لكن ضد اننا نجبرها ،ونهينها ونعايرها لانها مش محجبة ونخلي الحجاب مجرد علامة تميز المسلمة عن المسيحية
ومجرد غطاء تخفي بيه تصرفاتها وتقصير اهلها ،
ومجرد وسيلة لارضاء مجموعة من المختليين اللي مش بيهمهم الاساس والجوهر والتربية ،،
اد ما بيهمهم الشكل واعتباره علامة تدين وبدونه تصبح في حكم المنحلة .