حبايبى الحلوين اخباركم ايه يا رب تكونوا بخير
جيبالكم بقى وصفة تجنن
فطير ساده و شرقى فى ٥ دقايق
بيتزا الجلاش السريعة
ما شاء الله اللهم بارك شايفين الجمال
شايفين التوريقه الرهييييييبة و اللون اللى يجنن
الجلاش هو الجوكر بتاعنا و لازم يكون موجود عندنا دايما ينقذنا فى اى حاجه
و لو ماقولتوش محدش هيعرف شكله و طعمه زى الفطير و احلى كمان
بلفه جلاش اعملوا احلى مهرجان فطير و لا أحسن محل فطاطرى
و من غير تعب و لا مجهود
مقادير سهله جدا و بسيطه و نتيجه مضمونه بإذن الله
مهرجان الفطير / فطير الخمس دقايق
المقادير :
المقدار داه بيعمل اتنين فطيره كبيره بالحجم الحلو داه
من كيلو إلى كيلو و نصف جلاش
طريقة تحضير وعمل بيتزا الجلاش السريعة بالجبنة واللحمة …
خليط التوريق :
كوب زبده أو سمنه سايحه
ربع كوب زيت
كوب زبادى الكوب اللى بنعاير بيه باقى المكونات كوبايه مش علبه
من نصف إلى ثلاث اربع كوب قشطه
ربع كوب لبن اللى هو الحليب
م ص بيكنج بودر
حشو الفطير الشرقى :
حسب الرغبه
لحمه معصجه أو سجق أو لحوم بارده
زيتون مفروم و فلفل رومى مفروم و طماطم لحم بدون البذر متقطعه صغير
ميكس جبن أو موتزاريلا بس
الطريقه :
هنجيب بوله و نحط فيها مكونات خليط التوريق كله مع بعضه
و نقلبه كويس اوى بالمضرب السلك اليدوى بحيث ميكنش فيه اى تكتلات
و هو بيكون تقيل شويه مش خفيف أو سايل و داه عادى و بنجيب صينيه مدوره
انا هنا استخدمت صينيه مقاس ٢٦ سم و بندهنها زيت
و بنبدأ ناخد ورقه ورقه من الجلاش و نحطها فى الصينيه و نخلى أطرافها لباره
و بندهن ما بين كل ورقه و التانيه بالنسبه لعدد الطبقات داه براحتكم
بنخلص الطبقات الأولى و بناخد الأطراف و نتنيها على جواه
و بندهنهم كويس اوى و بعدين بنبدأ نحط الطبقات اللى فوق و ندهن
ما بين كل طبقه و التانيه و فى الاخر بنسكن الأطراف بتاعتهم تحت الطبقات
اللى تحت بحيث يكون شكلها مظبوط و متساوى و بندهن وشها
برضو بنفس الخليط و بالنسبه للفطيره الشرقى نفس الفكره لكن فى النصف بنحط الحشو
و بعد ما ندهن وشها بنحط على الوش شويه جبن و زيتون و فلفل رومى
و طماطم علشان الشكل بندخلهم فرن سخن على الرف اللى
فى النص على درجه حرارة 200 بياخدوا من ٢٠ إلى ٣٠ دقيقه اكتر
او اقل حسب الفرن لغايت ما نلاقيهم اخدوا لون حلو و انتفخوا
و لو الوش كان لسه ما اخدش لون بنشغل الشوايه ثوانى و لما نطلعهم من الفرن
لو بنحب الفطير مقرمش هنسيبه مكشوف و لو عايزينه يطرى شويه هنغطيه
يدوب كام دقيقه بورقه زبده أو فويل
و بالهنا و الشفا
