حبايبى الحلوين اخباركم ايه يا رب تكونوا بخير
جيبالكم بقى وصفة تجنن
طبعا مفيش احلى من النقنقه كده فى شويه بسكويت حلوين
ما شاء الله اللهم بارك شايفين الجمال
بسكويت توك اللى كلنا بنحبه كبار و صغيرين
احلى بسكويت مملح هتجربوه طعم و قرمشه تجنن
مقادير سهله جدا و بسيطه و نتيجه مضمونه بإذن الله
ان شاء الله تجربوه و يعجبكم و ماتنسونيش فى دعوه حلوه
بسكويت توك المملح بالطريقه الاصليه ( soda crackers )
طريقه عمل بسكوت توك المملح :
المقدار داه بيعمل الكميه دى و طبعا تقدروا تضاعفوا الكميه براحتكم
و خدوبالكم من التكنيك لأنه مختلف شويه
معلقتين كبار زبده
معلقتين كبار زيت
م و نصف ص خميره فوريه
م ص سكر
ربع م ص بيكنج صودا اللى هى بيكربونات الصوديوم اللى هى الكربوناتو
موجود عند العطار اللى بيتحط في الطعميه و مهم جدا و أساسي فى الوصفه
ربع م ص ملح
كوب و نصف دقيق بسكويت أو جميع الاغراض
٦ م ك مياه
للوجه :
ملح خشن / بحرى
و ممكن ندهن البسكويت حسب الرغبه بصفار بيضه و شويه لبن و رشة قهوه سريعة الذوبان أو كام نقطه خل
طريقة تحضير بسكويت توك المملح :
هنجيب بوله و نحط فيها الدقيق و الخميره و السكر و الملح و البيكنج صودا و نقلبهم كويس
و نسيبهم على جنب و فى كسروله عالنار هنحط المياه و الزيت و الزبده احنا عايزينهم يدفوا
بس و يتجانسوا مع بعض و هنرفعهم من عالنار و هنعمل حفره فى المواد الجافه و نضيفهم
و مش هنعجن احنا يدوب بنلم العجينه و بعدين هنغلفها بكيس بلاستيك أو بلاستيك راب
و ندخلها الثلاجه و نسيبها ترتاح لمده ليله كامله ازاى ١٢ ساعه يعنى نسيبها من بليل للصبح
و تانى يوم بنطلعها قبل الاستخدام بحوالى ربع ساعة علشان تاخد درجه حرارة الجو و بعدين بنطريها
بإيدنا شويه و بنبدأ نفردها ما بين ورقتين زبده أو كيسين بلاستيك بسمك رفيع اوى على قد
ما تقدروا علشان البسكويت يطلع مقرمش معانا و بنخلص الكميه كلها و بنرصهم على صينية الخبز
على ورق زبده أو ندهن الصينيه دهنت زيت خفيفة و بندخله الثلاجه يتماسك حوالى ربع ساعه
قبل الخبز و لما يطلع بنخرمه كله بالشوكه علشان ما ينتفخش أثناء الخبز و لو حابين ندهن الوش
أو لا حسب الرغبه و بنرش عالوش شويه من الملح الخشن و بندخله فرن سخن على الرف
اللى فى النص على درجه حرارة 160/170 لغايت ما يستوى و ياخد اللون الحلو بياخد من ١٠ إلى ١٥ دقيقة
حسب الفرن طبعا و لما يطلع بنسيبه يبرد تماما و بعدين بنحتفظ بيه فى علبه محكمه الغلق
و بالهنا و الشفا
طريقة عمل بسكوت تاك المملح جديدة وسهلة
