السلام عليكم يا أهلى الحبايب
تحياتي لكم جميعا أينما كنتم …أجمل وصفة ممكن تعملى بيها الكبد والقوانص اللى بتجمعيها من الفراخ

هو إنك تعملى بيها أرز معمر حادق …اعمليه وحيسيبوا أى أكل تانى جنبه ….يالا بينا⁦

الأرز المعمر بالكبد والقوانص
المقادير :
(٣ ) أكواب أرز _ كبدة فراخ مسلوقة (أو قوانص )_ كيلو لبن (٤)أكواب _

(٢)كوب شوربة _ قشطة لبن (أو علب ) _ملح _فلفل _قرفة (على حسب الذوق )
الطريقة :
*نغلى اللبن ونضيف ليه الشوربة (بعد تصفيتها) ونضيف عليه تلات معالق كبار قشطة (لزيادة دسم اللبن )

*نتبل الأرز بالملح والفلفل
*نضع( نصف) كمية الأرز فى الطاجن الفخار أو الصينية اللى حنسوى فيها (أنا بأستعمل حلة ألومنيوم )
*نقوم بوضع قطع الكبدة(أو القوانص ) فوق الأرز ..
*نغطى الكبدة بباقى كمية الأرز .

*نقوم بصب اللبن والشوربة على الأرز بحيث تغطيه وبزيادة( عقلتين) تقريبا …
نضع على وش اللبن معالق متفرقة من القشطة اللى عندنا
*ندخل الحلة (أو الطاجن )الفرن على الشبكة فى النصف ونشغل الشواية حوالى خمس دقايق لغاية لما الوش يآخد لون ….
وبعدين نغطى الحلة ونشغل الفرن من تحت على درجة( ١٨٠) ..
لغاية لما الأرز يتشرب خالص ويستوى تماما…بيإخد حوالى ساعة .وألف هنا وشفا
يارب يعجبكم (وما توفيقى إلا بالله)
ملحوظة :
*حنلاحظ الأرز ماشاء الله مفلفل ومش معجن خاالص …مش بحبه دايب

*يمكن اضافة علبة قشطة من السوبر ماركت على وش الأرز
*بسلق الكبدة الأول مش بأحطها (نية )علشان ماتديش لون غامق للأرز
*بسلق القوانص مش بأحطها( نية )علشان بتآخد سوى أكتر من الأرز
*ممكن وبنفس الطريقة أستعمل قطع فراخ وبأستعملها( نية )مش لازم تكون مستوية بتآخد سوى الأرز وبتبقى تحفففة
*ممكن أستعمل قطع فراخ كاملة بالعظم …
بس أديها صدمة الأول على النار علشان الجلد يآخد لون وأعملها بنفس الطريقة …
والفراخ بتطلع فى الأرز دايبة جدا وطعمها وووووهم
*مش بأحب أضيف أى مادة دهنية زيادة( زبدة أو سمنة …اللى يحب براحته )
قبل الفرن …نضع طبقة من الأرز وعليها قطع الكبدة والقوانص (المتوفر )


أضع طبقة الأرز التانية

أغطى الأرز باللبن المغلى المضاف إليه الشوربة …ومعالق من القشطة

بأستعمل حلة ألومنيوم لعمل الأرز المعمر

الأرز وفيه قطع الكبدة والقوانص