أنجح طريقه لعمل البسبوسه المرمله بزياده وطعمها تحفه
مسا مسا عليكم
بسبوستي القمر وطعمها تحفه ومع حته قشطه كده يا سلام حاجه عظمه
الطريقه
اول حاجه الشربات بيكون خفيف وبارد
كوبيه وربع مايه
كوبيه ونص سكر
وعصره لمونه
احطهم علي النار يدوبك يغلو غلوتين واقفل النار عليهم واشيلهم علي جنب
البسبوسه
نص كيلو سميد
١٥٠جرام سمنه دايبه
٢٠جرام جوزهند ناعم
١٥٠جرام لبن
٢٥٠جرام سكر
١٠٠جرام شربات تقيل وبيتعمل زي شربات الكنافه
(نص كوبيه سكر ربع كوبيه مايه عصره لمون واحطهم علي النار يغلو خمس دقائق لحد مايتقل )
بحط السميد في بوله وبنزل عليه السمنه واقلبهم مع بعض وانزل كمان جوز الهند
واحطهم علي جنب واحضر اللبن مع السكر مع الشربات التقيل واحطهم علي النار
يدفو علي النار بس ما يغلوش وانزلهم علي السميد ومقلبش كتير يدوبك يخطلطه
ببعض واحطهم في صنيه وادخلهم التلاجه عشر دقايق علشان حبه السميد
تتشرب كل المكونات وبعد كده ادخلها الفرن اول ما تطلع انزل عليها الشربات البارد وتتقطع لما تبرد
لما بسيت السميد بالسمن
هنا حطيت السكر واللبن والشربات التقيل
لما حطيت الخليط علي السميد
وهنا لما حطيتها في الصنيه
لما طلعت من الفرن وحطيت عليها الشربات
احلي حته الحرف بتاع البسبوسه مع القشطه الله
بسبوستي
وهي عليها القشطه
وده شكلها من جوه مرمله وحلوه
